Ancelotti-a'n Real a thlah ta

Carlo Ancelotti chuan Inrinni zan khan a tawp nan Real Madrid a kaihruai a, tun season-a an league match hnuhnung berah Real Sociedad chu 2-0 in an hneh.

Ancelotti tan Real a enkawl hnuhnung ber a nih bakah, FIFA Club World Cup zawha chhuak tur Luka Modric tan Santiago Bernabeu-a a match hnuhnung ber a ni bawk a, chak chung ngeiin kum tam tak, "Kan khelmual" tia an lo sawi ṭhin chu an thlah.

Real tan Kylian Mbappe bawk chu player langsar a ni a, French striker hian goal hnih a khung - league match 34-a goal 31 khungin season a khar a, top scorer a nih ngei a rinawm.

Mangṭha Carlo

Ancelotti-a'n Brazil national team a enkawl tawh dawn a, Xabi Alonso chu Real Madrid coach thar a ni. King Carlo hian Real tan nomawi 15 zet a chawi a, he club tana champion hnem ber coach a ni.

Italian coach ropui hian June 2013 - May 2015 inkar Real hi a lo enkawl tawh a, Champions League, UEFA Super Cup leh FIFA Club World Cup-ah te a champion pui. June 2021 khan Real-ah a kir a, a hun hmasa lam aiin hlawhtlinna a chhar hnem zawk.

La Liga (2), Copa del Rey (1), Supercopa de Espana (2), Champions League (2), UEFA Super Cup (2), FIFA Club World Cup (1) leh FIFA Intercontinental Cup (1) ah te a champion pui a, tun season-ah erawh nomawi chawi nei loin Real a thlah ta.

Modric karah Mbappe

Real fan-ten an coach ropui King Carlo leh, club tana nomawi 28 zet chawi thei Modric te an thlah a, Ancelotti leh Modric lem chuanna banner lian tak chu stadium-ah zar niin, minute 87-naa lakchhuah Modric hi Real ṭantuten amah zahna lantir nan ding chungin an thlah.

Hei mai a ni lo - Croatian midfielder hi Real Madrid bakah an hmachhawn Sociedad player-te chuan guard of honour an pe a, Ballon d'Or chawimawina meuh lo dawng tawh player thlah nan a mawi takzet.

A tawpa sawi zui hlawh tak erawh Mbappe a ni a, Real-a a season hmasa berah nomawi chawi lo mah se, French striker hian a league match hnuhnung parukah goal 11 a khung - inelna hrang hrangah match 55 khelin goal 42 a khung a, assist vawi li a nei.