Player ka chhuah hma lo ang - Tuchel

England coach Thomas Tuchel chuan June international break atan squad a puang a, June 7 zanah Andorra nen World Cup qualifier an khel ang a, June 10 zanah Senegal nen friendly match an khel bawk ang.

England leh Senegal inkhelh zawh aṭanga ni ngana, June 15-ah Club World Cup khelh ṭan a ni dawn a, Three Lions squad-ah CWC khel tur player pariat awm mah se, Tuchel chuan a kir hma tir bik loh tur thu a sawi!

Tuchel chuan, "Kan hun neih ang angte chhawr ṭangkai kan duh a, chutihlaia haw hmatir bik player neih chu a dik lo ang," a ti a, a ngaihdan sawh sawn a tum lo.

England captain Harry Kane-a khelhna Bayern Munich chuan June 15-ah hian match an nei nghal dawn a, Kane-a telin an khel thei dawn lo a nih hmel.

Tuchel-a squad-ah hian Manchester City midfielder Phil Foden, West Ham forward Jarrod Bowen, Tottenham Hotspur striker Dominic Solanke leh Crystal Palace midfielder Adam Wharton te chu koh zingah an tel lo.

England boss Tuchel chuan Solanke chu a biak thlap thu sawiin, "Player dang kan enchhin ve phawt a ngai a ni," a ti.

Hliam vangin Marcus Rashford leh Palace player pawimawh Marc Guehi te an tel lo a, Luke Shaw, Kobbie Mainoo leh Harry Maguire pawh koh a nih loh avangin Manchester United player squad-ah an awm lo.