PSG tan treble a hnai zel

Paris St-Germain chuan treble champion ni turin match khat chak chiah an mamawh ta - French club hian Inrinni zan khan Reims chu 3-0 in an hneh a, Coupe de France-ah an champion.

PSG tan Bradley Barcola chuan goal hnih a khung a, Achraf Hakimi chuan goal khat a thawh bawk. Ligue 1 champion hian first half chhungin goal thum hi an khung vek a, Stade de France-a inkhelah kawng tinrengin an chungnung zawk.

Luis Enrique enkawl team hian May 31, Inrinni zan dar 12:30-ah Champions League final an khel dawn a, Serie A tawp zanah league nomawi chawi ta lo Inter Milan nen an inkhel dawn.

PSG hian hnehna an chang a nih chuan an club chanchina Champions League nomawi an chawi hmasak ber a ni ang a, Barcelona tana treble champion lo ni tawh Enrique tan treble champion a nih vawi hnihna a ni bawk ang - thawnthu ropui ziak turin match khat chiahin a dang ta.