Nomawi 100 chawi thei Djokovic

Hun rei tak a nghak a, a tirah hlawhtling mai lo mah se beidawng duh loa a beih miau avangin a hlen chhuak ta - Novak Djokovic chuan tennis a khelh hun chhungin nomawi 100 a chawi tling ta chiah a ni.

Inrinni zan khan Geneva Open final-ah Djokovic hian Hubert Hurkacz chu 5-7, 7-6 (7-2), 7-6 (7-2) in a hneh a, inkhel inhnehtawk leh hmuhnawm taka hnehna chan hi a tan a hlu zual bik ngei ang.

Kum 38 mi Djokovic chuan, "Min ṭantu an ṭhahnem em em a, stadium chhunga mi zawng zawng khan min lawmpui vek ni berin ka hria. Ka tan chuan he hmuna nomawi 100-na lak hi duhthusam a ni," a ti.

Tun hnai tournament a khelh hnuhnung paliah Djokovic hi hneh nei loin a tla vek, beiseina nei sang vak lo chungin Geneva hi a pan a, a tan chuan clay court inelna lian French Open pawh beiseina a sang leh ta sawt ang.

Clay court inelna lian ber French Open hi vawiin aṭangin first round khelh a ni dawn a, seeded parukna Djokovic hian a match hmasa ber atan vawiin tlaiah Mackenzie McDonald a hmachhawn leh nghal dawn a ni.