US Open dinhmun a chiang lo
US Tennis Association (USTA) chuan kumina US Open kalpui dan tur an la tichiang thei lo a, June thla thlen hma US Tennis Association (USTA) chuan kumina US Open kalpui dan tur an la tichiang thei lo a, June thla thlen hma chuan thutlukna siam an tum lo - hri leng vanga khawvel dinhmun an ngaichang rih phawt a ni.
Grand Slam pali zinga khelh hnuhnun ber ni ṭhin US Open hi August 81 aṭangin Flushing Meadows, New York-ah khelh tur a ni. Mahse, coronavirus vangin khawvel a buai mek a, a hun pangngaiah khelh theih a ni dawn em tih a chiang lo.
Inlena neihna tur khawpui New York-ah hian Covid-19 vangin mi 10,000 chuang an thi tawh a, ram chhunga inkharkhipna chu May 15 thleng kaltlangpui turiin sorkarin thuchhuah an siam.
USTA chief executive Mike Dowse chuan, "Mumal taka sawihona kan la nei lo, hriselna leh hri leng dinhmun zir chiangtu an awm a, anni thu kan ngaichang hmasa ang. Player leh fans tan a him tih a chian phawt loh chuan kan kal tlang ka ring lo.
"Entu nei loa inelna neih tih thawm pawh a awm, kei chuan chutiang chuan kan tih ka ring lo. Fans awm lo ringawt mah se mi tam tak an inrawlh a ngai tho a, khawvel hmun hrang hrang aṭangin player 100 chuang daih an kalkhawm a ngai tho a ni," a ti.
USTA hian pawl hminga an thuchhuah hnuhnung berah chuan US Open hi an ruahman dan anga kaltlangpui theih an la beisei reng. Chutihrualin United States chhungah hri lengin ziaawm lam a pan mai theih loh avangin an dinhmun tak hriatthiam a har.
July thlaa khelh tur Wimbledon chu kumin atan ṭhulh fel a ni tawh a, clay court inelna lian French Open chu May thlaa khelh tur ni mah se September thla tawp lama khelh turin an sawn tawh bawk.
Kum tina US Open khelhna ṭhin Billie Jean King National Tennis Centre chu tunah hian hri leng vanga damlo enkawlna hmun atan an hmang lailawk mek a, khum 450 dah a ni.
Dowse chuan, "Mihring dinhmun a inang lo, damlo enkawltu mithiam bakah naupang school kal thei lo leh eitur nei mumal lo mi 25,000 chuang zet chu nitin eitur kan siamsak mek a, tun dinhmunah chuan infiamna aiin hri leng dona kawngah tha kan thawh rih," a ti.