Arteta dah sangtu David Luiz
Arsenal defender David Luiz chuan an manager Mikel Arteta kaihhruaina hnuaiah beisei a neih san thu a sawi a, tawnhriat la ngah lo mah se tun chinah pawh a lakah rinna a nghah ngam thu a sawi.
Manchester City assistant manager ni ṭhin Arteta hian nikum December thla aṭang khan Arsenal hi a enkawl a, manager puitling a nih hnuah team a enkawl hmasak ber a ni - match 16 khelh pui tawhin vawi hnih chiah chak loh an nei.
Luiz chuan, "Kan hnena a rawn kal khan thil tih danglam tak a nei, player leh coaching staff chauh ni loin club pumpui kha pumkhatah min siam a ni. A thil tum leh hmathlir kan hriatthiam pui a, a kianga hnathawh a nuam,” a ti.
Covid-19 vangin Premier League an chawl lailawk mek a, an chawlh hma match hnuhnung ber an khelh thleng khan Gunners hi table-ah pakuana an ni - Europa League aṭangin an tla tawh bawk.
Spanish manager Arteta hi English football-a inhnamhnawih hming langsar zingah chuan coronavirus kai hriatchhuah hmasak a ni a, tunah chuan a naute enkawl turin a dam fel leh tawh.
Brazilian defender chuan sawi zawmin, "Kan manager-in Covid-19 a kai tih kan hriatchhuah ni kha chuan kan hlau em em a, inah kan tawmim vek. Amah bakah player leh club tana hnathawktu dangte pawh kan inkhung hrang ngal vek.
"Kan dinhmun enfiah zui a ni a, hri kan kai lo tih hriat kha chuan rilru a hahdam huai. Kan inven lawk theih nan Arteta khan zirtirna ṭha tak mi pe ni pawhin a hriat," tiin a sawi.