May-ah Bundesliga khelh theih hmel lo
German sorkar chuan an ramah inkharkhipna a kalpui chhunzawm zel rih dawn, football inelna lian Bundesliga pawh beisei ang chuan May thlaah khelh tum ni mah se an khelh theih a rinawm ta lo.
Chancellor Angela Merkel chuan, "Zirna in te chu May 4 aṭangin hawn ṭan a ni tawh ang a, dawr tenau zawkte pawh an inhawng thei tawh bawk ang. Mahse, mipui punkhawmna chu August 31 thleng khap chhunzawm a ni," a ti.
German-ah hian club liante chuan training an nei ṭan leh tawh. Kar hmasa khan DFL chief executive Christian Seifert chuan May thlatir lamah hian inelna chu entu awm loa khelh theih an beisei thu a lo sawi tawh.
Bundesliga hi khel chhunzawm thei ni tehreng pawh ni se September thla hma chuan entu an awm thei dawn lo tihna a ni a, player leh club tam zawk chuan fans awm ngeia khelh theih chu an duhthusam a ni.