Italy ram malin in awm lo - Djokovic
Tennis world number 1 Novak Djokovic chuan Covid-19 vanga buaina nasa tak tawk mek Italy chu an hriatreng thu a sawi a, hri leng vanga harsatna tawkte ṭanpui nan sum ṭhahnem tak a thawh.
Serbian star hian hri leng zualna Bergamo hmuna damdawi in hman atan pawisa hi a pe, a pek zat tarlan ni lo mah se damdawi in thuneitu lam chuan an mamawh tam tak an lei theih phah tur thu an sawi.
Australian Open champion lai Djokovic leh a nupui Jelena te hian an rama hri kaite ṭanpui nan sum tam tak an lo thawh tawh bawk a, khawvelin hun harsa a tawh laiin an phak tawkah theihtawp an chhuah.
Djokovic chuan, "Duhtak Italy, hun harsa leh hrehawm in tawk mek tih ka hria, he hunah hian malin in awm lo a, in lamah kan ṭang tlat a ni. Chhel takin awm ula, thuawihna, inrintawkna leh inpekna nen he hun harsa hi kan paltlang ngei ang.
"Engtik niah emaw chuan hri leng hi a la reh ang a, chutih hunah chuan boruak zangkhai tak hnuaiah kan la inhmuh leh ngei ka beisei," tiin Italy rama hri kai leh hnathawkte an hriat reng thu a sawi.
ASTT Bergamo Ovest CEO Peter Assembergs chuan, "Bank accout ka en a, hetianga tam ṭanpuina kan dawn hi ka ring phak lo. Sum tam tak min petu zinga mi chu Novak Djokovic a ni," a ti.
Nimin tlai thleng khan Italy ramah hian hri kai mi 162,000 chuang awmin an zinga 21,000 chu an thi. Italy ram chhungah pawh Bergamo hmunah bik mi 60,000-in an vei tawh a, mi 11,000 an thi tling hial.