Champions League: August 29-ah final khelh tum

UEFA chuan April 23-ah meeting a nei dawn a, coronavirus vanga inelna neih chhunzawm theih lohte neih a nih theih dan hi an ngaihtuah dawn a ni. 

August 29-a Champions League khel zo tur chuan tualchhung league-te khelh dan tur ngaihtuah hmasak a ṭul dawn a, UEFA tan thutlukna hi awlsam taka siam theih a ni dawn bik lo. 

Covid-19 hri len hma khan Champions League final khelh hun tur chu May 30 tih a ni a,  Ataturk Olympic Stadium, Istanbul-in European football-a club inelna sang ber final hi a thlen tura tih a ni. 

Europe-a club inelna sang ber dawttu Europa League final chu May 27-a khelh tura tih a ni thung a, Gdansk khawpuia awm Stadion Energa GdaNsk-in a thlen tura ruahman a ni thung. 

Mahse, Covid-19 vanga inelna kalpui chhunzawm theih a nih tak lohah chuan final khelh hun tur hi a chiang lawk thei lo - tunah ruahmanna thar a rawn ri ṭan a, UEFA hian an hnuaia inelna te khelh zawh ngei a duh tih a lang. 

UEFA ruahmanna tharah chuan Champions League leh Europa League final khelhna hmun tur hi sawn a ni dawn lo a, ruahmanna hmasa ang thoin Istanbul khawpui leh Gdansk te chuan final hi an thleng ang.

European football-a final pahnih khelh inkar pawh hi ni thuma inhlat tur thoa duan a ni - August 29-ah mipui nghahhlelh Champions League final hi khelh a ni ang a, August 26-ah Europa League final hi khelh tura ruahman a ni thung. 

Tarlan tawh angin tuna 'ni' an ruahman hi chu rawtna ang chauh a la ni reng a, thil thleng thei dang te ngaihtuah chungin April 23-ah hian thutlukna chiang zawk siam a ni ang. 

UEFA tan thutlukna siam a harsa dawn - June-ah European football-a league-te chuan inkhel an ṭan leh thei tawh a nih chuan kalphung pangngai anga tualchhung league ruala European football hi kalpui tum a ni. 

Mahse, June-ah tualchhung league-te an khel hman lo a nih chuan UEFA chuan league khelh zawh vek hunah Champions League leh Europa League a kalpui ve leh chauh ang - Eruopean football-a dam rei club-te an hah rei deuh dawn tihna a ni ber. 

Tualchhung league zawhah inelna hi kalpui a nih chuan tournament pakhat anga kalpui a ngai dawn tihna a ni a, Champions League leh Europa League final khelhna tur hmun khawpuiah ve ve inelna hi neih vek tur a ni ang.

Champions League lamah chuan last 16 match riat khelh tur awmah match li chu khelh zawh a ni tawh a, match li dang hian second leg khelh an la hmabak thung. 

Paris Saint-Germain, Atalanta, RB Leipzig leh Atletico Madrid-te chuan quarterfinal hi an lut chiang tawh a, second leg khelh la hmabak zingah Real Madrid vs Manchester City chu a tel. 

Europa League hi Champions League ai maha buai tur chu an ni. Round of 16 second leg chu la khelh loh vek a ni a, Inter Milan vs Getafe leh Sevilla vs Roma chu first leg pawh khelh a la ni lo. 

UEFA chuan Thawhlehni khian a hnuaia awm ram 55 aiawhte chu titi puina a nei phawt dawn a, Nilainiah European Clubs' Association leh European League-a thuneitute chu inbiakna a neihpui leh ang. 

Europe-a football thuneitu sang ber hian a hnuaia pawl hrang hrangte hi hmachhawp a neihsa hi a sawipui dawn a, chumi zawhah chuan kar leh Ningani (April 23) khian executive committee an nei dawn a ni. 

Executive Committee hi thutlukna tak tak siamtu tur an ni dawn a, April 23-ah tun season atana European football hma hun chu a chiang dawn tihna a ni.