A tawp niah Barcelona an chak

La Liga champion Barcelona chuan Pathianni zan khan tun season atana an league match hnuhnung ber an khel a, an mikhualna ramah Athletic Club chu 3-0 a hnehin a hmawr an bawk ṭha hle.

Athletic Club mualah Barcelona tan harsatna a awm lo, striker ṭha Robert Lewandowski chuan chawlhlawk hmain goal hnih a khung nghal a, hun tawp dawnah Dani Olmo chuan a chak nemnghehna a khung bawk.

Hansi Flick-a naute hian league match khelh hmabak pahnih an neih lai khan La Liga nomawi an chawi dawn tih a chiang tawh a, an tan a hnu lam chu nuamsa taka khelh theih a ni, tun season chhungin league goal 102 an khung tling ta hial.

Bayern Munich streiker hlui Lewy a la rintlak, Poland international hi kum 36 mi ni tawh mah se tun season La Liga bikah goal 27 a khung a, inelna hrang hrangah goal 40 a khung bawk.

Barca manager Hansi Flick hian season tharah chuan Xabi Alonso enkawl Real Madrid a el a ngai tawh dawn a, boruak a danglam tawh ang. Alonso chungchang sawiin Flick chuan, "Bayer Leverkusen tana a hnathawhte ka hria a, sawi tam a ngai lo.

"Player tam tak a chher hriam a, a ṭha sa a ti ṭha lehzual bawk. La Liga lama a lo kal tur hi ka lawm hle," tiin a sawi a, manager pahnih ten thawm an nei chho ngeiin a rinawm.

League match tawp zanah Atletico Madrid chuan Girona chu 4-0 in an sawp a, striker palian Alexander Sorloth chuan goal thum a khung.