Norris umphaktu an awm lo

Pathianni zana tlan zawh tak Monaco Grand Prix-ah Lando Norris a chak ber. McLaren driver hian a hmasa ber aṭangin intlansiak bul a ṭan, hnehna a chan avangin car intlansiakna sang berah champion a beisei ngam chhunzawm bawk.

Tualchhung tlangval Charles Leclerc chu pahnihnaah a thleng a, season hmasa khan hnehna lo chang tawh mah se kuminah a chhunzawm thei rih lo, dawhsan lawn chinah McLaren driver pakhat zawk Oscar Piastri a awm bawk a ni.

Britain tlangval Norris chuan, "Ka naupan lai aṭangin engtik niah emaw chuan Monaco Grand Prix-ah hian hnehna ka la chang ve ngei ang tiin ka suangtuah ṭhin a, tunah chuan a takin a lo thleng dik ta.

"Team ṭha tak ka nei a, ka mamawh leh ka tana ṭha tur hre em em tu an ni. An hnen aṭangin puihna ka dawng ṭha hle a, ka chakna hnar an ni," tiin a sawi a, driver championship lamah a teammate Piastri a phak lohna chu point thum chauh a ni.

Intlansiak hnuhnung zawka hnehna changtu Max Verstappen chu palinaah a thleng. Red Bull driver Verstappen hian season hmasa chawhnu lam aṭang khan beisei a phak thei rih lo, kuminah pawh a nomawi humhim a harsa dawn.

Dutch tlangval Verstappen chuan, "Intlansiak nuam leh hlimawm tak a ni, keini aia che ṭha zawk an awm erawh an lawmpui awm rualin hmasawn kan ngai tihna a ni," a ti. Red Bull hian a duh ang thlap car an siamsak thei rih lo niin a lang.

Beiseina sang tak nena Ferrari zawmtu Lewis Hamilton chuan chak ni hmel a la hmu thei bik lo thung. World champion vawi sarih lai ni tawh hi panganaah a thlang a, atan a vawi riat nana title lak a harsa dawn tih a sawi ngam a ni.