Silverstone-ah Bezzecchi a chak ber

Italian rider Marco Bezzecchi chuan MotoGP British Grand Prix-ah hnehna a chang. Pathianni zan khan Silverstone tlankawngah intlansiak neih niin a hmasa berah a thleng a ni.

Tlankawngah oil a buak avangin intlansiak a khaihlak a, rider ṭhenkhat chuan an chetsual phah bawk. Buaina karah Bezzecchi a rawn ding chhuak a, nikuma Grand Prix of the Americas an tlan hnu lamah Aprilia team chuan chak ni hmel an hmuh ve leh theih phah thung.

Season hmang ṭha Marc Marquez leh a nau Alex Marquez te pawh oil bua vanga buai zingah an tel a, an hmahruaina an humhim thei lo, an tan chuan a uiawm khawp ang, siamṭhat theih erawh a ni tawh bik lo.

Kum 2023 Indian GP hnua a chak lehna hmasa ber tawngtu Bezzecchi chuan, "Tun hnai chu harsatna hrang hrang ka tawk ve a, a bik takin mimal nunah pawh harsatna ka nei, chutiang karah chuan Aprilia hian ka chungah rinna an nghat tlat.

"Tlankawngah harsatna a lo thleng leh a, mi ṭhenkhat an buai karah pawh a vannei ber zingah ka tel leh hlauh a, hmalam ka pan theih avangin ka lawm," tiin a sawi a, atan chuan hun hlimawm a ni ang.

Bike intlansiakna sang ber hi June 8, Pathianni tlai dar 5:30 hian Ciudad del Motor de Aragón-ah an tlan leh dawn a ni.