Knicks an chak ve leh phawt

Chak lo ni se la chuan New York Knicks tan thawh chhuah a harsa tawh ang, mahse nimin zing NBA Eastern Conference final game 3-ah Indiana Pacers chu 106-100 in an hneh.

Game hmasa pahnihah Knicks hi an chak lo, best of seven series a nih avangin chak lo ni se la chuan an dinhmun a chhe tawh hle ang. Game 3-ah pawh dinhmun hniam zawkah an ding reng a, quarter hnihna tawp lamah phei chuan point 20 laiin an hniam zawk.

Mahse, inkhel chawhnu lamah huaisen taka bei letin an tho chhuak. An chak theih nan hian Karl-Anthony Towns a pawimawh, quarter hnuhnung bikah point 20 tehmeuh neiin a team a chak pui.

Towns chuan, "Team in min mamawh a, ka chungah mawhphurhna an hlan bawk. Chu mawhphurhna pawimawh leh lian tak ka hlen chhuak thei chu ka lawm, ka tan chuan theihnghilh theih a ni tawh lo ang.

"A tawpah mimal fakna ka dawng hnem, a nihna takah chuan ka ṭhiante khan min duhsakin remchang min siamsak hnem em a ni," tiin a sawi a, a ṭhiante chungah a lawm hle.

May 28, Nilaini zing dar 5:30-ah game 4 an khel leh dawn. Pacers forward Pascal Siakam chuan, "Inkhelah chuan kan duh ang veka thil a thlen loh chang a awm, tun ṭumah pawh khan dan hleih theih loh kan neih vang a ni," a ti a, an match lehpekah chu an lak a rin thu a sawi bawk.