Fury hmachhawn ngei duhtu Joshua
British boxer rothap Anthony Joshua chuan boxer chanchin ngah ve tak Tyson Fury chu amah hmachhawn turin a ti a, boxer pahnih chu an intawng thei a nih chuan thil ropui tak a nih tur thu a sawi.
Joshua hian heavyweight boxing-a kawnghren ngaihhlut hlawh pali zinga pathum - IBF, WBA leh WBO kawnghren chu a kawl a, Fury hian WBC kawnghren a hreng thung.
Kum 30 mi Joshua chuan, "Number 1 ka ni tih pholang tur chuan Tyson Fury ka hmachhawn a ngai a, chutiang chiah chuan ani pawhin Joshua hmachhawn hi a mamawh a ni," a ti.
Joshua hian IBF dan a zawm a ngaih avangin Bulgarian boxer Kubrat Pulev chu hmachhawp a neih hmasak ber a ni a, mahse Pulev nen hian June 20-a inhnek tura tih ni mah se coronavirus vangin an inhnek hun hi sawn a ni.
Fury hi February-a WBC kawnghren a chhuhsak Deontay Wilder nen inhnek tura tih an ni thung a, mahse anni pawh hi July-a inhnek tura ruahmanna kalpui ni mah se October-ah an inhmachhawn theih chauh a rinawm.
Joshua chuan, "Number 1 anga i inchhal duh a nih chuan min hmachhawn rawh. Kawnghren dang zawng ka kawl vek a, kan inhmachhawn hian number 1 chu chiang takin min hrilh thei ang.
"Kawnghren tam tak kawltu champion ka ni a, Fury hi WBC champion a ni thung. Ani leh kei kan inhmachhawn chuan heavyweight thununtu dik tak, kawnghren zawng zawng kawltu kan nei thei dawn a ni," tiin a sawi.
Joshua leh Fury fight thleng tur hian Pulev leh Wilder an hmachhawn ve ve phawt erawh a ṭul dawn a, fighter ropui pahnih inhnek hmu tur hian nakkum tal chu kan nghah a ngaiin a rinawm.