NFC U20 final-ah Mizoram Vs Delhi

27th May, 2025

Swami Vivekananda Men’s U20 National Football Championship final chu vawiin tlai dar 3:30 hian Ramakrishna Mission Ashrama Ground, Chhattisgarh khelh a ni dawn a, Mizoram leh Delhi te an inhmachhawn dawn. Nomawi inchuhna hi Indian Football youtube channel-ah a en theih ang.

Mizoram hian final-ah hrem vangin player pawimawh Michael Lalbiaksanga (playmaker) leh Freddy Lalruatkima (right back) te an tel thei dawn lo a, Lalrindika Hmar hote tan an harsa dawn. Delhi hi champion lai an nih bakah group stage hi thla liam ta April 15, Thawhlehni khan group stage an khel zo tawh a, April 17, Ningani khan quarterfinal an khel zo tawh bawk.

Delhi hian thla khat chuang an hahdam hnuah May 25, Pathianni khan semifinal an rawn khel leh chauh a, SAI 4-0 a hnehin final an lut. Mizoram aia hahdamna hun an ngah avangin final-ah pawh Delhi hi an buk a rit zawk a, nikum semifinal-ah Mizoram an hneh tawh bawk avangin an inringtawk khawp ang. Delhi an nih avanga dah hniam a rem lo a, NorthEast rawlthar ṭhahnem tak an awm tih hriat a ṭha - champion lai an ni pawh hi a mak lo, an ṭha hrim hrim.

Chutihrualin Lalrindika Hmar kaihhruai Mizoram team hian nomawi chawi ngei tumin Chhattisgarh an pan a, an tum ram thleng turin vawi khat chak chiah an mamawh tawh. Mizoram tan Electric Veng, Lunglei rawlthar Mesak C. Lalrinngheta'n goal sarih a khung tawh a, Ṭumpui Kolasib rawlthar PC Pazawna'n goal ruk a khung tawh bawk. Mesak leh Pazawna te bakah mual sir aṭanga nawr thiam Sangau rawlthar Ngurthanmawia (goal thum) te an pawimawh dawn.

Delhi lamin Laishram Rahul Meitei (goal 7) leh Aditya Adhikari (goal 6) te an kawl avangin Ṭhuampui rawlthar Freddy awm lo tur hi a pawi thei tlat. Hei vang hian Champhai Zotlang rawlthar Laldawngzuala leh Venglai Kawnpui rawlthar C. Zomuanpuia te an pawimawh dawn. Midfield-ah Khamrang rawlthar Joel Lalramengmawia a awm a, ani hi Chanmari FC tana khel niin SYS chhuak midfielder hian hmabak a nei êng hle.

Mizoram coach Lalrindika Hmar chuan, "Delhi hi an hmatawng an ṭha a, winger-te ball an chan lohna tura midfield-a kan hneh a ṭul dawn. Michael leh Freddy te awm lo tur hi a pawi a, chutihrualin an aiawh tur player kan nei e. Mizoram tan theihtawp kan chhuah dawn a, min ṭawngṭaisak turin Mizo mipuite kan ngen," tiin Vanglaini a hrilh.