Durtlang fiahna tur Kawnpui Vengthar

LBS Suzuki 22nd Inter Branch YMA Football Tournament 2025 quarterfinal-ah vawiin chawhma dar 11:00 hian Durtlang leh Kawnpui Vengthar te an inkhel dawn. Durtlang hian kum 2011 khan Red Ribbon Football-ah nomawi chawi tawh mah se CYMA Football-ah an la champion ngai lo. Nikum khan Kawnpui Jt-in LPC Cup final an thleng a, tuna inlan tur erawh Kawngpui Vengthar an ni thung.

Durtlang hi inelna ṭan hma aṭanga team ṭha tura ngaih an ni a, beisei ang ngeiin an thleng sang bawk. Quarterfinal lut turin Mamit Hmar Veng (2-1), Ainawn (3-1), Muthi (4-1), leh Chawnpui (1-0) te an hneh tawh a, goal 10 khungin goal thum an chhuah. Durtlang hian tlarhnungah Lalchungnunga an nei a, Mumbai City defender Hmingthanmawia a inhliam avangin East Bengal defender Chungnunga hi tlarhnungah a pawimawh hle.

Tlarhma lamah Durtlangin Lalliansanga (Notea) an nei a, Chawnpui nena hrem vanga khel thei lo Lalmuanzova a rawn kir thei tawh bawk ang. Aizawl FC wing back Lalfelkima chu winger-ah chhawrin an goal nawrna ber a ni a, captain Ricky Lallawmawma chu midfield-ah awmin team innghahna a ni a, Chawnpui lakah pawh goal awmchhun a khung.

Chutihrualin Durtlangin goalkeeper an nei ṭha tawk lo a, Kawnpui Vengthar erawhin Aizawl FC goalkeeper pahnih Vanlalhriatpuia leh Lalhruaitluanga te an kawl. Last 16-a College Veng 2-0 a an hneh ṭumin Hruaia'n goalkeeper hna chelhin Hriatpuia'n tlarhnung a ho a, Hriatpuia hi man of the match-a thlan a ni.

Kawnpui Vengthar hian MPL10 best player H. Lalbiakthanga an kawl a, BT-a hian College Veng lakah goal ṭha bik a khung. Goal nawr turin Albert Zohmingmawia te an awm a, Aizawl FC winger hlui hi club level-ah inlan tawh lo mah se CYMA Football-ah chuan a la chhawrtlak hle.

Quarterfinal a nih tawh avangin boruak a sang tawh dawn a, penalty hmanga chak zawk zawn a ngai a nih chuan Aizawl FC keeper awmna hi rinkai zawk an ni dawn. Hei vang hian Durtlangin hun pangngaia chinfel theih an tum ang.