Chawhnu dar 2:30-ah ṭantu ngah Sialhawk Vs Republic Veng

LBS Suzuki CYMA Football 2025 quarterfinal match hnuhnung berah vawiin chawhnu dar 2:30 hian Republic Veng leh Sialhawk te an inkhel dawn. Sialhawk hian All Mizoram Inter Village Football 2022 khan Mizo mipui thinlung rawn hnehin ṭantu pawh an ngah a, an khingpui tur Republic Veng hi football tuichilh veng an ni thung.

Sialhawkin ṭantu an nei ṭhat a rinawm a, kawr pawl hain RG Stadium mawi an tum dawn. Republic Veng mipui pawhin an veng tlangvalte ṭawiawm turin kawr sen, flag leh khuang nen an thawk chhuak dawn a, khelmual chhunga an nem zawk a nih pawhin a pawn lamah chuan ṭha zawk tura ngaih an ni.

Nimin lamah Kawnpui Venglai an tlak tak avangin Kawnpui Vengthar leh Sialhawk te chiah Aizawl khaw pawn an awm tawh a, R. Laldanmawia leh a ṭhiante hian Aizawl khaw pawnah nomawi hawn ngei an tum. Tun ṭum inelnaah hian Lungchhuan (2-0), New Diakkawn, Kolasib (5-1), Chanmari West (1-1, P4-3) leh Serchhip Vengchung (7-3) ten an hneh.

Nomawi chawi thei bik Danmawia'n a thiam thil a la theihnghilh lo a, scoresheet-ah a hming hmuh tur a awm ve zel a, Crespo Vanlalhriatpuia'n Serchhip Vengchung lakah hattrick a siam avangin inrintawkna a ngah dawn. Sialhawk hian match li aṭangin goal 15 khung tawhin goal nga an chhuah.

An khelh tawhna thlir chuan Republic Veng buk a rit zawk. Lalsangzuala Hmar hote hian Zemabawk East (16-0), Chanmari (2-0), Samlukhai (6-0), Khawzawl Zuchhip (5-0) leh Khawzawl Vengthar (1-0) te an hneh a, goal 30 khungin goal an la chhuah lo. Tlarhnungah goalkeeper RS Lallawmzuala te an kawl a, Chanmari FC keeper hmaa ding turin Laltluangliana, Lalmuanawma (Munez) leh Laldanmawia te an awm. Sialhawk duo Crespo leh Danmawia te tan Republic Veng tlarhnung sut tlang a har ang.