Midang tan Eto'o a luang chhuak dawn
Barcelona leh Cameroon striker hlui Samuel Eto'o chuan an rama mipui 1,00,000 hnenah coronavirus hri leng darh zel tur ven nan a thlawna thil a sem tur thu a sawi a, social media lamah pawh khawvela striker ṭha ber pawl ni ṭhin hian Covid-19 darh zel tur do nana tih ngaite sawiin ṭan a la a ni.
Kum 39 mi Eto'o chuan, "Khawpui pali Douala, Buea, Yaounde leh Bafoussam-a in 50,000 velah tal sahbawn, sanitizer leh ei tur sem kan tum a ni," a ti a, hmai khuhna 50,000 vel chu an ram taxi driver-te hnenah sem an tum thu a sawi bawk.
Eto'o hian an ramah midangte ṭanpuitu pawl Samuel Eto'o Foundation a nei a, he pawl kaltlang hian mi harsa zawkte a ṭanpui ṭhin. Samuel Eto'o Foundation chuan thuchhuah siamin, "Mihring tena kan hun tawn rapthlak ber pawl kan tawng mek a, fai taka inenkawl leh invenna hmanrua nasa taka kan sem hian coronavirus hi kan hneh thei dawn chauh a ni," an ti.
Cameroon tan vawi 118-a inlana goal 56 khung thei Eto'o te ramah hian Cameroon health minister Manaouda Malachie-a'n April 5-a a puan dan chuan mi 650-in hri hi an kai tawh a, mi 165 dam tawhin an zinga 17 an thi tawh thung.