Kawnpui Venglai tan Armed Veng South an ṭha hret

LBS Suzuki CYMA Football 2025 quarterfinal match hmasa berah Armed Veng South chuan Kawnpui Venglai 4-0 a hnehin semifinal an lut. Armed Veng South hian kum 1995 leh 2005 khan final an lut tawh a, kuminah nomawi chawi ngei tumin hma a la a, kawng dik an zawh zel.

Nimin inkhelah hian AVS tan J. Lalbiakliana'n (Valpuia) goal hnih a khung bakah Lalnunsanga (Talea) leh Lalfamkima ten goal khat ve ve an khung a, Kawnpui Venglaiin a chhanletna an nei lo. Team ṭha zawk Armed Veng South-in hnehna an chang.

RG Stadium-ah inkhelh hun a hma hret a, entu an tam tawk lo. Armed Veng South-in bul an ṭan ṭha hret a, Lalengmawia captain-na hnua khel Kawnpui Venglai ṭang thei viau mah se first half an ṭang tluan thei lo. Minute 36-naah Laldawngliana Colney freekick pet chu goalkeeper leh defender ten 'clear' thei loin goal ban a per hnuah Valpuia'n hnai zet aṭangin a rawn su lut.

Kawnpui Venglai an muthlu chhunzawm a, freekick aṭang bawkin minute 40-naah goal an chhuah. Captain C. Ramdinmawia vawrh luh chu box chhngah Valpuia'n changin awlsam takin a khung. First half-ah AVS-in goal hnih an neih avangin nuam sain an khelh theih phah.

Minute 80-naah goalkeeper Moses Lalbiakngura ball pet chhuah chu mual laiah Richard Lalramnunpuia'n changin MPL11-a Ramhlun Athletic striker hian Kawnpui defender inkarah dah lutin Talea'n a um lut a, Mizoram Police forward hian cool takin a khung.

AVS an khel ṭha zel a, minute 89-naah captain Ramdina'n ṭha zeta lalutin mual dinglamah ball a pe a, Famkima'n lalutin pet fuh tawk lo mah se goal-ah a lut tho. Quarterfinal hmasa berah champion rinkai zinga mi Armed Veng South 4-0 in an chak a, Kawnpui Venglai tan an ṭha hret.