Bethlehem VT-in Bawngkawn an lehthal

LBS Suzuki CYMA Football-ah Bethlehem Vengthlangin Bawngkawn 2-1 a lehthlain semifinal an lut a, Lalbiaksanga Colney hoin champion kawng an zawh zel. RG Stadium-a inkhelah hian Bawngkawnin Vanlalawmpuia hmangin goal khung hmasa mah se BVT-in PC Laldinpuia leh Emmanuel Lalhruaizela te hmangin an lehthal a, chakna goal khungtu Ema chu man of the match-a thlan a ni.

Nimin inkhelah hian BVT-in inkhel bul an ṭan ṭha zawk a, ball pawh an chang tam zawk. Mahse, minute 12-na lekah Bawngkawn winger H. Lalmuankima a rawn inlar a, a ball pass ṭha zet chu goal ruakah Aizawl FC academy chhuak AwP-a'n a khung.

BVT lamin goal an chhuah hnuah an nawr na lehzual a, Bawngkawn lam an ṭang khawng thei hle. Mahse, minute 34-naah Lalramzauva corner pet chu Aijalon Lalliantluanga'n hmun himah a nam per thei lo a, PC Laldinpuia'n chang fuhin ISL club Chennaiyin defender hian mawi zetin a ke vei lamin goal-ah a pet lut. Dinpuia hi football a khelh ṭantirh lamah chuan striker a ni a, ISL chu sawi loh MPL a khelh hma a ni thung.

Second half-ah pawh BVT an chungnung zawk a, vei lam aṭanga Lalrammawia vawrhluh chu Emmanuel Lalhruaizela tan duhthusam a ni a, Bawgkawn defender-te awmna a dik lo bawk nen Ema hian minute 56-naah chakna goal a khung. BS-a kaihhruai BVT hian hma an hruai hnunah pawh inkhel an thunun zawk a, 2-1 in hnehna an chang.

Semifinal hi May 29, Ningani chawhma dar 11:00 hian RG Stadium-ah khelh tur a ni a, Bethlehem Vengthlang hian Kawnpui Venglai hnehtu Armed Veng South an hmachhawn ang.