Premier League club-ten season hman zawh theih inbeisei
Nimina Premier League club aiawh ṭhukhawm chuan inkhelh hmabak match 92 te chu khelh zawh ngei an inbeisei a, inkhelh zawh hun tur erawh thutlukna an siam lo. Cub-te hian June 30-a inelna zawh chungchang an sawi ho rin ni mah se inelna zawh theih dan tur an sawi ho ta thung.
Coronavirus avangin March 13 aṭangin inelna neih theih a ni lo a, April 30 thleng inelna chawlh lailawk a ni. April 16, Ningani khan British sorkar chuan kar thum chhung atan lockdown an pawhsei leh tak avangin May thla tirah pawh inelna ṭan theih a rinawm lo a, fixtures pawh siam theih a la ni lo.
June 30 hian player ṭhahnem tak contract hi a tawp dawn a, chung zingah chuan Chelsea midfielder Willian leh Tottenham defender Jan Vertonghen te pawh an tel. Hemi belhchhah tur hian Liverpool chuan an thawmhnaw siamtu company chu New Balance aṭangin Nike-ah an thlak dawn a, Watford leh Newcastle te pawhin kit supplier an thlak dawn bawk.
Khawvel football thuneitu sang ber FIFA pawhin harsatna hi an hrethiam a, hun rei lote chhung contract pawhsei dan te an ngaihtuah. Chutihrualin dan ang chuan club-in player an ti lui thei lo a, chumi awmzia chu June 30 hnua inelna a la kal zel a nih chuan club-in season kal laiah an player pawimawh an chan thei dawn tihna a ni.
BBC Sports-in poll a lakah chuan 39%-in season chu awmze nei loin tawp se an ti a, 28% chuan hun rei zawk pawh nghah ngai se season tawpna tur a nih chuan nghah an thlang zawk. UEFA chuan Europe club-te season hman zawh dan kawng zawng turin a ngen tawh a, karleh lam hian season tawp dan tur relin an ṭhukhawm ve leh ang. Europe-a thuneitu sang ber hian Champions League final hmanga season khar turin rawtna siam an tum a, August 29-ah UCL final hi khelh an tum.
Premier League hnuai lama inelna thuneitu English Football League-te pawhin club-te chu May 16 aia hmaa training nei lo turin lehkha a thawn tawh a, EFL hian inelna ṭan hun chungchangah sorkar an la rawn lo. Covid-19 vangin Europe ram hrang hranga league-te kapui theih a ni lo a, zawh ngei erawh an tum thung.
Germany-ah April 30 thleng chawlh lailawk ni mah se Bundesliga club-ten training an zawm leh tawh. Spain-ah training la neih theih a ni lo a, La Liga president Javier Tebas chuan May 28-a inelna ṭan theih a nih chuan thu lawmawm a nih tur thu a sawi. Ligue 1 lamah June 3 emaw June 17-ah inelna ṭan tum a ni a, tun dinhmunah chuan June 17 hi a rinawm zawk. Serie A lamah Italian Football Federation (IFF) chuan May thla tir hian player-te Covid-19 an vei em tih endik an tum a, inelna zawh theih dan kawng an dap zel.