Hun thar duhawm a inṭan ta - Alonso

Real Madrid manager thar Xabi Alonso chuan Santiago Bernabeu-ah hun thar duhawm tak a inṭan leh dawn ta, niin a sawi. Bayer Leverkusen boss hian Real hi kum thum chhung atan a zawm a, June thlaa khelh tur Club World Cup chu a tournament hmachhawn hmasak ber tur a ni nghal ang.

Alonso chuan, "Hun thar duhawm tak chu a inṭan ta. Real Madrid fan-te pawh he hun duhawm tawng a, a hma aia ropui lehzuala he club thawnthu ziak thar tur hian an phur takzet a ni," a ti a, Madrid khawpuiah hlawhtlin a tum hle.

Bayer Leverkusen tana 2023-24 season-a league leh German Cup champion nomawi chawitu Alonso chuan, "Ka tan chun ni duhawm tak a ni a, he ni hi ka chhinchhiah reng tawh ang. Ka in ang maia ka ngaih hmuna ka lo kir thei hi ka lawm hle a ni," a ti.

Kum 43 mi Alonso hi Real tan player a nih laiin season nga a khel hman a, La Liga, Copa del Rey (2), Supercopa de Espana leh Champions League-ah te a champion pui.

Alonso chuan, "Player ṭha tak tak kan nei a, team ṭha tak, tun leh nakina hlawhtling zel thei tura theihna nei team kan ni. Chu chuan thatho taka he club pan tur hian phurna min pe a, team ropui tak kan din theih ka beisei," a ti.

Spanish manager chuan, "Real-in a phu ang ngeiin, nomawi tam tak kan lo chawi tawh ang khan thil ropui tak kan ti thei ang tih ka ring tlat a, fan-te nena inthlunzawm tlat, hmachhawp ropui tak nei team enkawl hi ka duh a ni," a ti bawk.

Alonso hian Real coach ropui Carlo Ancelotti a thlak a, Italian coach kaihhruaina hnuaiah hian Real leh Bayern-ah a khel tawh.

Spain tana Euro nomawi pahnih leh World Cup chawi thei Alonso chuan, "Carlo kha ka coach a ni a, mi ropui tak, mi hneh thei tak a ni. Amah vanga tun dinhmun thleng thei ka ni a, inchhuang tak chungin a sulhnu ka chhui dawn a ni," a ti.