Sinner leh Alcaraz ten hnehna an chang

French Open khelh ṭan a ni a, mipa champion tura rinkai Jannik Sinner leh Carlos Alcaraz te chuan an khingpui ve ve hnehin first round an paltlang a, mipui ngaihven zui bik an ni chhunzawm ang.

Player ṭha pahnih Sinner leh Alcaraz te hi seeded pakhatna leh pahnihna pek an ni a, an chak chho zel a nih pawhin final hma chuan an inhmachhawn thei dawn lo, player ṭha dang erawh an hmachhawn a ngai dawn.

Sinner a chak

Damdawi hman phal loh a hman avangin thla thum chhung hrem a ni a, hrem a nih chhung hian Grand Slam khelh an nei lo. French Open hma deuhin hremna a hmang zo a, inbuatsaihna a nei hman tihna a ni.

Thawhṭanni zan inkhelah Sinner hian a khingpui Arthur Rinderknech chu 6-4, 6-3, 7-5 in a hneh a, tualchhung tlangval paltlang tur hian harsatna lian tham a tawk lo - Court Philippe Chatrier chhungah a thiam a la theihnghilh loh tih a lantir thei a ni.

Italian tlangval Sinner chuan, "Tournament khelh hi chuan match hmasa ber hi a awlsam ngai lo. Tun anga ṭhaa ka khel thei kha ka lawm, a bik takin set thumna ka lak danah khan ka lawm takzet.

"Rinderknech kha a ball vuak a nain a hlauhawm thei em em a, ka ṭhat tawk lohna laiah tak min rawn bei thiam em em bawk. Mahse, ka lo inveng thei ve zel a, a tawpah vannei zawk ka ni," tiin a sawi.

World number 1 Sinner hian a match lehpekah chuan Richard Gasquet a hmachhawn leh ang, a match zawnin tualchhung player a hmachhawn dawn tihna a ni a, ṭantu neih tam a harsa rih ang.

Alcaraz a tlang

Champion lai a ni a, clay court hi a inkhelh thiamna a nih bawk avangin Carlos Alcaraz chu mipui ngaihven a hlawh zual, a match hmasa berah harsa lo takin Giulio Zeppieri chu 6-3, 6-4, 6-2 in a hneh.

Spanish tlangval hian hnehna chang turin minute 56 bak a mamawh lo - Grand Slam hi chawlhkar hnih chhung khelh ṭhin a ni a, match tir lama hun an hman rei loh hian thahrui an khek thei a, inelna tawp lamah a ṭangkai ṭhin.

Kum 22 mi Alcaraz chuan, "Mahni khelh dan phung dik neih nghal mai hi a harsa ṭhin, tun ṭumah erawh ka beisei phak baka ṭhain ka khel thei nghal, tun ami ang hian match hmabak pawh ka khelh chhunzawm theih ka beisei," tiin a sawi.

French Open inbuatsaihna hnuhnung Italian Open final-ah Alcaraz hian Sinner hnehin nomawi a chawi a, a boruak ṭha a la chhawm nung tihna a ni a, a hmabak Fábián Marozsán pawh paltlang a la harsa vak lo tura ngaih a ni.

Clay court inelna lian ber French Open bikah Alcaraz hian match 22 a khel tling ta chiah a, vawi 19 lai hnehna changin ṭum thum chu a chak lo lamah a ṭang thung - kuminah hian a vawi hnih nan champion a tum dawn.

Inkhel dang

Tournament lianah chuan beisei loh leh rin lawk loh result kan hmu fo ṭhin - French Open khelh ṭan niah pawh world number 4 Taylor Fritz a tla nghal. US tlangval hian Daniel Altmaier chu 7-5, 3-6, 6-3, 6-1 a ngam loin a zinkawng a tawp nghal.

Kum 27 mi Fritz hian season hmasa khan US Open final a lut a, nomawi inchuhna inkhelah Sinner a ngam lo. Tun season erawh beisei angin a la khel chhuak thei lo, world number 47 Altmaier lakah rinkai ni mah se a tho chhuak thei lo.

Fritz chuan, "Mak tak maiin point pawimawh ka hmuh hun turah ka tisual leh tlat ṭhin a, khatiang huna chetsual tlat chuan chak theih a ni lo. Ka taksa leh rilru lam a inpeih lo pawh a ni lo, kumin ka hman dan erawh hriatthiam harsa ka ti," tiin a sawi.

Inkhel dangah tun hma lama final vawi hnih lo lut tawh Casper Ruud a chak - Ruud hian Albert Ramos-Vinolas chu 6-3, 6-4, 6-2 a hnehin second round a inhlangkai; seeded 10-na Holger Rune chuan Roberto Bautista Agut 6-7 (4-7), 6-4, 6-3, 6-2 in a hneh bawk.

French Open 2021 finalist Stefanos Tsitsipas pawhin Tomas Martin Etcheverry 7-5, 6-3, 6-4 in a hneh a, seeded 18-na Francisco Cerundolo erawh world number 54 Gabriel Diallo lakah 7-5, 6-3, 6-4 in a chak lo zawkah a ṭang thung a ni.