Alonso thlaktu tur Ten Hag

Bayer Leverkusen chuan Xabi Alonso thlak nan Erik ten Hag an lalut fel a, Dutch manager hian June 2027 thleng daih contract a ziak. Kum 55 mi Ten Hag hian nikum October thlaa Manchester United a chhuahsan hnua manager hna a thawh lehna hmasa ber tur a ni.

Man United-ah Ten Hag-a'n sawisel hlawh deuh mah se Old Trafford-ah kum hnih chhuang hret thuneihna a chelh chhungin FA Cup leh League Cup nomawi a chawi a, chutihrualin English club a chhuahsan hian league-ah 14-na an ni mek. Mahse, hetihlai hian Man United hi Champions League khel pha chinte nen pawh an point a inthlau lo a, Ruben Amorim-a hnuaiah result neih ṭhat belh loin 15-na nichungin season an khar.

Bayer Leverkusen hian Alonso hnuaiah 2023-24 season khan league leh German Cup an champion a, Spanish manager hmunruak hi hnawhkhat a harsa dawn. Ten Hag chuan, "Leverkusen-in tun hnaiah tum sang tak in nei a, hei hi chhawm nun zel ka duh. Team thlak danglam hun lai taka rawn kal hi, ka tan chona nasa tak a ni," tiin a sawi. Dutch manager hian July 1 aṭangin Leverkusen-ah hna a ṭan ang.