Punjab Kings-in qualifier 1 an khel dawn

Indian Premier League-ah Thawhṭanni zan khan Punjab Kings chuan Sawai Mansingh Stadium, Jaipur-ah Mumbai Indians wicket sarihin an hneh a, qualifier 1 khel turin an tling. Mumbai erawhin eliminator an khelh a ṭul dawn a, an khingpui tur a la hriat lo thung.

Inkhel pawimawhah Punjab ṭhumvawrah an vannei a, vawm hmasak an thlang. Mumbai Indians tan Surayakumar Yadav-a'n 57 runs siam mah se, opener pahnih Ryan Rickelton (27) leh Rohit Sharma (24) te ṭum dang an pha lo a, captain Hardik Pandya-a'n ball 15 lekah 26 runs a chungin 184/7 runs chauh an tlin.

Punjab ta opener Priyansh Ayra-a'n 62 runs a siam a, Josh Inglis-a'n 73 runs siam bawkin captain Shreyas Iyer-a'n thi loin 26 runs a rawn belh. Ball kua dah bangin Punjab-in 187/3 runs an siam a, wicket sarihin hnehna an chang.

Nizan khan Lucknow Super Giants leh Royal Challengers Bengaluru te an inkhel a, Virat Kohli telna RCB an chak chuan qualifier 1-ah Punjab Kings nen an inkhel ang. LSG an chak thung erawh chuan Gujarat Titans-in qualifier 1 an khel ang a, Punjab Kings an hmachhawn thung ang.

Playoff hi qualifier 1, eliminator leh qualifier 2-ah ṭhen hran a ni. Qualifier 1-ah hian pakhatna leh pahnihna te May 29, Ningani zanah an inkhel ang a, a chak zawkin final an lut nghal dawn.

May 30, Zirtawpni zanah pathumna leh palina an inkhel leh ang a, heta chak zawk leh qualifier 1-a chak lo zawkten June 1, Pathianni zanah qualifier 2 an inkhel dawn. Qualifier 1 leh qualifier 2-a chak ve ve ten June 3, Thawhlehni zan hian final an khel ang.