Real Betis vs Chelsea: An hmaah European nomawi!

Europa League champion a chiang tawh a, Europa Conference League leh Champions League nomawi chawi tur erawh a la hriat loh - zanin hian ECL champion chu a hriat dawn e.

Zanin dar 12:30 hian Real Betis leh Chelsea ten ECL final an khel dawn a, Blues-in Champions League leh Europa League nomawi an lo chawi tawh a, a lungthu kim nana ECL nomawi chawi an châk dawn.

Blues coach Enzo Maresca-a'n season ṭantirah ECL la thutak tawk lo mah se, final a nih tawh miau avangin en liam chi a ni dawn lo tih a chiang a, nomawi nena season khar ngei duhin a naute a rem dawn.

Chelsea an fuh!

Todd Boehly leh a ṭhianten Chelsea an lei hnuah team ropui din tumin sum tam tak an seng a, mahse, nomawi an la hlawh chhuak lo - tun season-ah coach thar Enzo Maresca an la lut a, Italian coach hoin thil thar tih an tum.

Maresca hoin Blues hian tun season-ah bul pawh an ṭan ṭha viau a, season laihawlah phei chuan champion hial an sawi ri hman - season tawp niah meuh chuan UCL khelh phak leh phak loh an buaipui!

Mahse, he Blues team naupang tak hian boruak sang an ngam tih pholangin, an league match hnuhnung berah an chak a, UCL an khel dawn - boruak fuh tak chungin zanin inkhel pawh an hmachhawn ang.

Di lenna!

Maresca tan zanin final hi a danglam bik dawn - kum 45 mi coach hian player a nih laiin Betis boss Manuel Pellegrini hnuaiah, 2011-12 season kha Malaga-ah a lo khel tawh a, 2018-19 season khan Pellegrini-a assistant coach niin West Ham an lo kaihruai dun tawh bawk.

Italian coach chuan, "Ka tan chuan ka 'professional' pa ang mai a ni," a ti - zaninah a pu hlui hneh tumin team a rem dawn a, Betis hi a nupuite khua Seville khaw club an ni bawk! Maresca chuan, "Seville khawpuiah ka nupui nen kan intawng a, ka fapa a piang bawk. Mahse, Betis hneh ka tum dawn," a ti!

Maresca hian Betis hmelma Sevilla tan a khel tawh bawk a, kum 2005 khan derby-ah goal a khung. Maresca chuan, "Betis-ah hi chuan min ngaina lo khawp mai," a ti a, an hliamah chi phul belh tumin zaninah a feh chhuak ang.

A bul ṭanna

Chelsea-in UCL an khel dawn a, ECL nomawi an chawi bawk chuan season ṭha tak, tiin a sawi theih ang. Maresca chuan, "Europe-a nomawi lian tham pali - UEFA Cup Winners' Cup, Europa, UCL leh ECL chawi hmasa ber nih kan tum dawn.

"ECL hi nomawi chawi zel tura kan zinkawng inṭanna atan hman kan tum tur a ni," a ti a, champion a tumruh hle. Blues tan nomawi chawi turin attacking midfielder Cole Palmer chet ṭhat a ṭul a, Nicolas Jackson-a'n mawhphurhna a lak a ṭul bawk.

Betis hian Manchester United aṭanga an club a pan hnua che ṭha tak Antony, Real Madrid-a hming chher tawh Isco te ho an neih avangin Blues tlarhnung tan inthlahdah a thiang lo ang.

Betis fans hlimna

Pellegrini chuan, "Betis fan-te hlimna kan thlen tih ka hmuh khan ka hlim hle. Final kan luh theih avangin kan lawm a, Chelsea kan hmachhawn dawn avangin kan phur lehzual a ni," a ti a, Blues a hlau lo.

Betis hi La Liga lamah pawh an che chhe lo. UCL khel thei dinhmunah an ding hman hial a, mahse, an league match hnuhnung paliah point thum chiah an hmu a, parukna ni chungin season an khar zui.

Spanish club ṭantuten UCL khelh phak loh rilru na thawidam nan nomawi chawi an duh dawn a, an champion chuan Europe-a nomawi an chawi hmasak ber a ni dawn bawk - thih tha nen an bei ang.