Danglamna thlen theitu mipui

LBS Suzuki CYMA Football 2025 semifinal en man hi Rs 50 chauh a ni a, mahni veng inkhel en nan chuan eng tham a ni lo. Inelna buatsaihtu CYMA leh MFA ten sum lut tur ringawt ngaihtuah loin, entu tam theih nan en man a titlawm a, hei hian rah ṭha a thlen ngei a rinawm.

Quaterfinal-ah entu tam hlutna a rawn lang a, Durtlangin ṭantu an neih ṭhat zarah Kawnpui Vengthar lakah an tho chhuak. Kawnpui Vengthar ṭantu zat kha Durtlang nen inzat ta se, result a danglam thei hial ang.

Mahse, Durtlang ṭantuten kawr sen nen an veng team an au phur a; an hlapui Lalchungnunga phuah 'Durkhawtualnuam' tih an sak rual ṭhup ṭhup kha chuan player-te phurna a pe tih a takin a hmuh theih.

Vangkhaw hmingthang Durtlang,

I Sakhming zoramah

A thangvel e khawtinah hian mawi takin

Aw Durzopui par ang vul zel rawh

Durtlangin hlapui an nei a, a sa tur mipui an nei ṭha bawk. Republic Veng pawhin ṭantu an nei ṭha a, kawr sen nen an thawm pawh a ring hle. Khuang lian bakah fans au rual theih nan hruai khawmtu thlengin an nei a, khelmual pawnah Durtlang leh Republic Veng an inbei tawk khawp ang.

Durtlang leh Republic Vengin ṭantu an nei ṭha viau a, a ngah ber tur zawk chu Bethlehem Vengthlang a ni. Branch YMA member ringawt pawh 4206 an awm a, heng zinga 2625 hi mipa an ni a. Armed Veng South-ah YMA member 2112 an awm a, BVT-a YMA member mipa an zat pha lo. Hei vang tak hian Armed Veng South tan insawmkhat ṭhat a ṭul lehzual dawn.

BVT an eng dawn a, Armed Veng South an sen dawn. RG Stadium-ah a sen nge langsar dawn a eng tih chu hunin a rawn hril ang.