Premier League coach ṭha ber Slot

Liverpool tana a season khatnaa Premier League nomawi chawitu, Reds manager Arne Slot chu League Managers Association (LMA) chuan Premier League manager of the year-ah an thlang.

Dutch coach hian Liverpool champion lawmna parade-a chhiatna thleng avangin Awards sem zan erawh a hmang thei lo a, Slot chuan, "Champion kan lawmnaa hliam tuarte ka tawrhpuizia lantir nan, awards sem zan pawh ka hman a rem ve ta lo a ni.

"LMA Awards sem zan hmang lo tura thutlukna siam hi a awlsam lo hle a, mahse, hliam tuarte ngaihtuah chuan thutlukna dik niah ka ngai si a ni," a ti a, a hmuna award a dawn theih loh chhan a sawifiah.

Kum 46 mi coach hian Jurgen Klopp thlakin, season ṭan dawn khan Reds a zawm a, player thar Federico Chiesa chiah la lut chungin league nomawi a chawi thei - league match li khelh tur la awmah an champion chiang tawh.

Thawhṭanni khan Liverpool kawtthlerah champion lawm zui a ni a, hetah hian car pakhat chu mipui punkhawmnaah tlan luiin, mi 50 chuangin hliam an tuar.

Slot chuan he hun harsaa anmahni thlawptute chungah lawmthu sawiin, "Football chhungkaw chunga lawmthu sawina remchangah he hun hi ka hmang duh. LMA, Premier League leh club hrang hrang, kan hun tawn harsa taka min thlawptute chungah kan lawm hle.

"Football hi hlawhtlin duha inelna a ni reng dawn a, chutihrual chuan, a bik takin tun ang huna inṭhianṭhatna hmun ṭha tak a ni thei bawk," a ti a, club-in hun harsa a tawn laia rang taka hnathawktute chungah lawmthu a sawi bawk.

Chelsea hmeichhe coach Sonia Bompastor chu tlawm nei loa league nomawi an chawi avangin WSL manager of the year-ah thlan a ni a, Championship-ah Daniel Farke (Leeds United), League One-ah Chris Davies (Birmingham City) leh League Two-ah Grant McCann (Doncaster Rovers) te chu an league-ah ṭheuh an champion avangin coach ṭha ber award hlan an ni bawk.

Everton boss David Moyes, Klopp, Jose Mourinho, Ian Holloway leh Mick McCarthy te chu competitive match 1000 zet team an kaihhruai theih avangin LMA hall of fame-ah lawmluh an ni.