Zanin dar 7:30-ah IPL Qualifier 1: Punjab Kings Vs Royal Challengers Bengaluru

Cricket inelnaa sum tamna ber Indian Premier League group stage chu khelh zawh a ni ta a, Royal Challengers Bengaluru-in Thawhlehni zan khan Lucknow Super Giants chu wicket ruka hnehin qualifier 1 an khel dawn. Zanin dar 7:30 hian qualifier 1 hi New Punjab Cricket Association Stadium, Mohali-ah khelh a ni nghal dawn a, RCB-in league round-a pakhatna Punjab Kings an hmachhawn ang.

IPL-a la champion ngai lo RCB-in qualifier 1 hlutna an hre chiang a, Ekana Cricket Stadium B Ground-a inkhelah Lucknow Super Giants target chhawpsak 227 runs an umpha. RCB hian vawm hmasak an thlang a, LSG tan Rishabh Pant-a'n (118*) century a siam bakah Mitchell Marsh (67) a chet ṭhat bawk avangin 227 runs an tlin hial.

Mahse, RCB-in target sang tak hi tlin ngei tumin ṭan an la a, opener Phil Salt (30) leh Virat Kohli (54) ten bul an ṭan ṭha a, middle order lamah Mayank Agarwal (41*) leh Jitesh Sharma (85*) ten a tawp an khar ṭha. Over 18.4-ah 230/4 runs siamin hnehna an chang.

Virat Kohli telna RCB hian zaninah Punjab Kings an hmachhawn dawn a, league round-ah vawi khat ve ve an chak. April 18, Zirtawpni khan Bengaluru hian an mualah Punjab Kings hi wicket ngain an hneh lo a, hemi ṭum hian RCB hian bat hmasain over 14-ah 95/9 runs an siam a, inkhel hi ruahsur vangin over tih tlem a ni. Punjab Kings hian over 12.1-ah 98/5 runs siamin wicket ngain hnehna an chang.

April 20, Pathianni zanah an inkhel lehnghal a, zanina an inkhelna tur hmunah RCB hian wicket sarihin hnehna an chang thung. Kings hian bat hmasain 157/6 runs chauh siam mah se RCB hi over 18.5-ah 159/3 runs siamin hnehna an chang. Zaninah tun season-a a vawi thum nan an inhmachhawn leh dawn a, chak tur hriatthiam a har hle.

Playoff hi qualifier 1, eliminator leh qualifier 2-ah ṭhen hran a ni. Qualifier 1-a chak zawkin final an lut nghal dawn. May 30, Zirtawpni zanah pathumna Gujarat Titans leh palina Mumbai Indians te an inkhel leh ang a, heta chak zawk leh qualifier 1-a chak lo zawkten June 1, Pathianni zanah qualifier 2 an khel dawn. Qualifier 1 leh qualifier 2-a chak ve ve ten June 3, Thawhlehni zan hian final an khel ang.