Hnehna nena bul ṭan Djokovic

Novak Djokovic chuan French Open a khel ṭan ve leh ta, a match hmasa berah Mackenzie McDonald chu 6-3, 6-3, 6-3 in a hneh a, a match lehpekah chuan Corentin Moutet a hmachhawn leh ang.

Thawhlehni zan Philippe-Chatrier Court-a inkhelah, seeded parukna Djokovic hian harsatna lian tham a tawk lo - darkar khat leh minute 58 chhungin set thum a la fel hman a, a tan hna hahthlak lutuk a la awm lo.

Hmanni lawk khan Djokovic hian Gonet Geneva Open nomawi a chawi, title 100 a lak tlin hnua a match hmasa berah nuamsa takin a chak thei tihna a ni a, a tan chuan chanchin lawmawm a ni bawk ang.

A bul ṭan fuh

Tournament lianah chuan a tir lamah chetsual palh a hlauhawm ṭhin a, clay court inelna lianah erawh Novak Djokovic hi a tir lamah a chesual ngai lo, vawi 20 a inlan tawhah first round a la paltlang vek.

Kum 38 mi Djokovic chuan, "Kei chuan he hmun nuam leh hlimawm takah hian, ka hun neih angte nuam leh lawm taka hman tawp mai hi ka duh a, minute khat lek pawh hi uiawm taka liam tir mai mai ka tum lo.

"He hmuna ka inkhelh hnuhnung berte kha ka la hria, ka tan chuan hun chhinchhiah tlak tak a ni zel. Kuminah pawh hian sulhnu ṭha tak hnutchhuah ngei ka tum dawn a ni," tiin a sawi a, major title 24 a lak tawh chu belhchhah a tum.

Djokovic hian French Open nomawi chawi a harsat ṭhin, mahse a hlawhtlin hlehtheih lohna hmuna an sawi Paris khawpuiah pawh hian ṭum thum ngawt a champion tho a, kuminah a vawi li nan nomawi chawi a tum ang.

Zverev a chak

Alexander Zverev pawhin ṭha takin bul a ṭan - German tlangval hian a vawi khat nan Grand Slam champion nih a tum leh dawn, a match hmasa berah Learner Tien chu 6-3, 6-3, 6-4 in a hneh a, a tan set hloh loh hi a pawimawh.

Seeded pathumna Zverev hian season hmasa khan French Open final hi a lut, mahse nomawi inchuhna inkhelah Carlos Alcaraz a ngam lo - major tournament final vawi li khel tawh mah se a la chak miah lo.

Kum 28 mi Zverev chuan, "Kumin tir lamah khan Tien nen hian kan intawng tawh, a chak lo zawk ka ni. Tun ṭumah erawh a tir aṭangin ka khel ṭha tluang hle a, a tawp thlenga ka buai lo zui kha chanchin lawmawm a ni," tiin a sawi.

Zverev hi player theihna sang leh beiseiawm berte zinga mi a ni ṭhin. Masters 1000 leh Olympic champion pawh a ni thei, mahse Grand Slam tak hi a harsat. Inelna tawp lama thahrui ngah turin a tir lamah set hloh loa chak a tum a ngai ang.

Inkhel dang

Daniil Medvedev erawh a tla nghal tlat! Russian tlangval tan French Open hi engtik lai mahin hmun ṭha a ni ngai lo, kuminah pawh a match hmasa berah Cameron Norrie chu 7-5, 6-3, 4-6, 1-6, 7-5 a ngam loin a zinkawng a tawp nghal.

Norrie hian nikum January aṭang khan world number 20 chin a la hneh leh lo, tunah chuan world number 11 Medvedev a hneh tak avangin a record duhawm lo tak chu thaibo a ni ta, a match lehpekah chuan Federico Gomez a hmachhawn ang.

Inkhel dangah Alex De Minaur chuan Serbian tlangval Laslo Djere chu 6-3, 6-4, 7-6 (8-6) in a hneh. Australian tlangval hi seeded pakuana pek a ni a, tun hma lama a chet tawh dan chhutin player ṭha dang tan pawha hmachhawn châkawm lo a ni dawn.

Player langsar zingah - Andrey Rublev leh Jakub Mensik te an chak laiin, seeded parukna Grigor Dimitrov erawh Ethan Quinn nen an inhmachhawn laiin a khel tluan thei lo; 6-2, 6-3, 2-6 in hma hruai mek mah se a malpui vei lam hliam vangin a inhnukdawk.