Knicks lakah Pacers an kal fal

NBA Eastern Conference Finals khelh laiah, nimin zing khan Indiana Pacers chuan New York Knicks chu 130-121 in an hneh a, best of seven series khelh turah 3-1 in hma an hruai fal ta a ni.

Pacers an chak theih nan hian Tyrese Haliburton a langsar hle, ani hian point 32 a neih bakah assist vawi 15 neiin ṭum 12 chu rebound a la bawk a, heng mai bakah hian ball hloh a nei miah lo!

May 30, Zirtawpni zingah game 5 an khel zui leh nghal dawn. Pacers hi an chak a nih chuan Eastern Conference champion an ni fel tawh dawn a, kum 2000 hnua a vawi khat nan NBA Finals an lut nghal bawk ang.

Pacers chakpuitu Haliburton chuan, "Game 3 kan khelh ṭum khan beisei ka phak lo a, ka ṭhiante leh coach rilru ka tihnual hle tih pawh ka hria. Ka chet fuh tawk lohna aṭanga thawhchhuah leh nghal kha ka thil tum lian tak a ni.

"Game 4 chu a tir aṭangin thapui kan thawh a, mimal ni loin team khelh ṭhat vanga hnehna chang kan ni," a ti a, an match khelh hmabakah inthlahdah a remchang dawn lo tih a sawi tel bawk.

Point 30 neitu Pascal Siakam leh Bennedict Mathurin (20 points) te an khel ṭha bawk a, anni pahnih leh Haliburton te an che fuh zel a nih chuan NBA champion nih thlengin an beisei ngam ang.