An ram team enkawl châk Zidane

Team enkawl nei loa chawl mek Zinedine Zidane chuan an ram France coach nih a chak thu a sawi a, engtik niah emaw chuan a suangtuah ṭhin chu a la thlen dik a beisei thu a sawi bawk.

Real Madrid manager hlui Zidane chuan, "Player ka nih lai khan kan ram tan kum 14 chhung vel chu ka khel a, chuvangin national team awmzia leh a kalphung chu ka hrechiang viau.

"A nihna takah chuan Les Bleus enkawl hi ka châk a, engtik niah emaw chuan ka duhthusam hi a la thleng dik pawhin ka ring," tiin a sawi a, nakkum World Cup an khelh zawh hunah an ram team hi enkawl theih a inbeisei.

Zidane ho hian World Cup 1998 khan France an champion, hemi ṭum hian player pawimawh leh langsar a ni. An champion ṭuma an player pawimawh pakhat Didier Deschamps chu tunah hian France ram enkawltu a ni mek thung.

Coach a nih hnuah Deschamps hian World Cup 2018 khan an ram a champion pui a, nakkuma World Cup an khelh zawh hunah a hna hi a kalsan dawn tih a sawi chiang tawh.

Deschamps thlaktu tur hi sawi chian la awm lo mah se Zidane hi thawm ring ber a ni mek. Real Madrid tana Champions League nomawi vawi thum chawi thei a ni a, theihna a nei. Mahse, Spanish club nen 2021 khan an inṭhen a, a hnu lamah team enkawl a la nei leh lo a ni.