Set hloh loin Gauff a chak

Coco Gauff chuan Thawhlehni zan khan French Open 2025 atan a match hmasa ber a khel a, set hloh loin Olivia Gadecki lakah hnehna a chang a, harsa vak loin second round a inhlangkai.

American nula Gauff hi seeded pahnihna pek a ni a, tun hmain final a lo khelh tawhna hmun a nih avangin kuminah champion tura rinkai zinga mi a ni, a khingpui Gadecki hi 6-2, 6-2 in a hneh.

Kum 21 mi Gauff hian hnehna chang turin darkar khat leh minute 11 chhung chauh hun a mamawh - a match lehpekah chuan qualifying paltlanga inlan Tereza Valentova a hmachhawn leh dawn a ni.

Gauff chuan, "Thli a thawt nasat avangin ball kal dan a danglam fo a, inkhelh pawh a harsat phah hle. French Open-ah hian chuan khawi court berah nge kan khelh tih hi hriatchian a ngai ṭhin, chumi a zir chuan khelh dan phung thlak a ngaih chang a awm," a ti.

Inkhel dangah Mirra Andreeva chuan Cristina Bucsa chu 6-4, 6-3 in a hneh a, season a hman ṭhat tak chu a chhawmnung zel. Andreeva hian kum 17 mi chauh a nih laiin nikum khan French Open-ah hian semifinal a lo thleng tawh, kuminah final a beisei ngam ang.