BVT-in Armed Veng South an vel

LBS Suzuki 22nd Inter Branch YMA Football 2025-ah Bethlehem Vengthlangin K. Lalramzauva goal hmangin Armed Veng South 1-0 in an hneh a, final an lut. BVT hian kum 2002 hnua a vawi khat nan final an lut a, nomawi chawi thiam coach Lalbiaksanga Colney hoin a vawi khat nan champion an tum.

Armed Veng South tan erawh nomawi beiseina a thamral a, football thiam veng tan champion turin nghah leh rih a ṭul dawn. Nimin inkhel an thlirkir ang a, AVS hian an la ui dawn chauh.

RZ-a Goal

Bethlehem Vengthlang leh Armed Veng South mipui RG Stadium-ah an pungkhawm a, BVT ṭantute thawm a ṭha zawk a, khelmualah pawh an chungnung hret.

Mahse, team ṭha pahnih an fimkhur a, chance ṭha hmuh tur a awm meuh lo. BVT tana mual dinglama awm RZ-a'n minute 27-naah Lalduhsaka bumin a la lut a, goalkeeper R. Malsawmkima'n a cross turah ngaiin a chhuak sual. RZ-a'n fing takin goal-ah a pet leh si a, BVT-in hma an hruai.

BVT tlarhnungah PC Laldinpuia leh a ṭhiante an din khawng tlat avangin Armed Veng South-in an nawr na thei lo a, BVT tlarhnung an ṭhiat thei lo. AVS captain C. Ramdinmawia'n vei lamah chance ṭha a nei a, a cross ṭhat tawk loh hnuah ball chang lehin lakluh tum mah se Dinpuia a paltlang thei lo.

AVS an vanduai

Second half-ah Armed Veng South-in goal an mamawh tih hriain striker Richard Lalramnunpuia leh Lalremliana Renthlei te an luhtir nghal. BVT bawkin bul ṭan ṭha mah se goal an neih tawh miau avangin goal venhim an ngai pawimawh zawk. AVS-in risk laa goal khung tuma an nawr avangin chance pawh an nei ṭha.

AVS midfielder J. Lalbiakliana'n box pawn aṭanga goal-a a thawn luh chu goal hmaah Richard-a'n a dang a, mahse hemi aṭanga ball kal zel hi Lalruatkima'n chang fuhin hnai tak aṭangin crossbar a pet per.

BVT pawhin Dinpuia khalh chhuah ṭhat hmangin chance ṭha bik an nei a, RZ-a'n amah pawttu, vengtu nei lo Giroud pe loin pet a thlang a, keeper Mana'n a dansak. AVS-in an nawr chhunzawm a, minute 76-naa rawn lut PC Lalrempuia'n (Tetea) chance ṭha a rawn insiam.

Tetea hian goalkeeper Lalmuansanga tan hna a siam a, dan harsa tur khawp erawh a ni lo thung. Captain Ramdina goal hmaah a ke a hmui tawk lo a, AVS an vanduai tel bawk. AVS hian box pawn chiahah freekick an hmu a, penalty turah an ngai zawk hial. Freekick hi Richard-a'n pet ṭha tawk mah se wall a per hnuah Tetea'n goal-ah a chantir. AVS lawm hman viau mah se Papuia a offside avangin pawm a ni lo.

Minute 90 chhunga khel ṭha zawk BVT an ṭang tluan a, 1-0 in hnehna an chang. Bsa Colney-in player leh coach angin an veng Armed Veng vawi li a champion pui a, a vawi khat nan an veng ni lo champion pui a tum ang.