Malaysia-ah Man United an au el

Manchester United-in season chhe bik an hmang a, sum mamawhna a san avangin nipui chawlh hmain Asia-ah an zin. May 28, Nilaini zan han Kuala Lumpur-ah ASEAN All Stars an hmachhawn a, 1-0 in an chak lo. Inkhelh banah entu mipuiten Man United player-te an au el.

Tun season Premier League khar nan Man United-in Pathianni zan khan Aston Villa an hneh a, 10620 km-a hla Malaysia an pan lehnghal. Asia ramah pawh Man United-in hahdamna an hmu lo a, an harsatna belhchhahin a awm.

Khuala Lumpur lum zawng hi 30 degrees aiin sang a, a uap tel bawk avangin European player tan khelh a harsa. Friendly match a nih angin duh zat zat thlak thei a ni a, Ruben Amorim-a'n outfield player 25 zet hmang mah se goal an khung thei lo.

Inkhelhna hmun Bukit Jalil Stadium-ah entu mipui 72,550 an pung khawm a, South East Asia XI tan Myanmar winger Maung Maung Lwin-a'n second half-ah goal awmchhun khung. Man United hian kum 2009 hnua Malaysia an tlawh lehna hmasa ber a ni a, inkhel en man hi £260 (Rs 29882.63) a ni a, entu mipuiin an pawisa pek phu khawp inkhel an hmuh loh avangin an au el a ni ber.

Inkhelh banah Ruben Amorim chuan, "Man United ka enkawl ṭantirh aṭanga kan inkhelh dana ka inthiam lohna hmasa ber a ni. Min auh el kha kan mamawh tak pawh a ni ang. Premier League-a chuan chak lo pawh ni ila, kan fan-te kan hnungah an ding tlat. Season tharah a danglam beisei ang," tiin a sawi.

Man United hian Premier League-ah point 42 an hmu a, 15-naah season kharin 1973-74 season-a an relegate hnua an season hman chhiat ber ṭum an hmang.