Zanin dar 7:30-ah IPL Eliminator Gujarat Titans vs Mumbai Indians

Indian Premier League-ah champion hriat nan match thum chauh khelh a ngai tawh a, zanin dar 7:30 hian Gujarat Titans leh Mumbai Indians te Mullanpur-ah an inkhel dawn. MI hi vawi nga champion tawh an ni a, Titans hian vawi khat chauh nomawi la chawi mah se chak tura rinkai zawk an ni.

League round-ah Titans hian point 18 hmuin pathumna an ni a, match tawp berah Chennai Super Kings hneh se qualifier 1 khel thei tur an ni. March 29, Inrinni khan Ahmedabad-ah Titans hian Mumbai hi 36 runs-in an sawp. Wankhede Stadium, Mumbai-ah May 6, Thawhlehni khan inkhel lehin DLS method hman a nih hnuah Titans hi wicket thumin an chak.

Titans hian Indian batter ṭha mi Shubman Gill an kawl a, a hlawh pawh nuai 16500 a ni daih. Bowling lamah nuai 1800 hlawh Afghanistan bowler Rashid Khan te a kawl. Tun inelnaa run siam tam ber erawh Gill (601 runs) ni loin 617 runs siamtu Sai Susdharsan a ni a, Chennai tlangval pawh hian tun inelna atan hian nuai 850 a hlawh.

Mumbai Indians-in bul ṭan ṭha lo mah se an rawn tho chhuak a, playoff hial an rawn khel pha. T20 specialist Suryakumar Yadav-a'n 640 runs a siam tawh a, SKY dawtah hian Ryan Rickelton (388), Rohit Sharma (329) leh Tilak Varma (274) te an awm. Bowling lamah Trent Boult-a'n wicket la hnem berin wicket 19 a la tawh a, India chhuanvawr Jasprit Bumrah (wicket 17) a awm bakah Hardik Pandya (13) leh Deepak Chahar (11) te an kawl.

Mumbai lam hian player langsar an kawl a, Bumrah hian nuai 1800 a hlawh a, Suryakumar Yadav leh Hardik Pandya ten nuai 1635 an hlawh a, Rohit Sharma-a'n nuai 1630 a hlawh. India chhuanvawr Rohit Sharma chet ṭhat ṭum a nih chuan Mumbai Indians tan chak beiseina a sang ang.