Reds-in Kelleher chhuah phal

Liverpool chuan an goalkeeper Caoimhin Kelleher chhuah an pawi ti lo a, hetihrual hian an second choice keeper hi pound maktaduai 20 aia tlawma chhuahtir erawh an tum lo.

Kum 26 mi Kelleher hian Liverpool-ah season khat dang khelh chhunzawm turin contract a la nei a, mahse, Reds hian Alisson an neih bakah Valencia atangin keeper Giorgi Mamardashvili an la lut bawk a, Kelleher tan third choice nih ai chuan chhuah mai a finthlak zawk.

Republic of Ireland international keeper duhtu zingah Brentford an langsar viau a, Premier League club hian an keeper Mark Flekken chu tun nipuia chhuak thei dinhmuna a din avangin, Kelleher hi an ngaihven.

Kelleher hi Reds-ah second choice ni mah se, keeper theihna nei sang a ni a, season hman zawh takah pawh khan Reds tan match 20 ngawt khelin, Alisson inhliam laiin Liverpool tan a rintlak ṭhin hle.

Irish keeper hian chona thar hmachhawn a duh thu pawh a lo sawi tawh a, Kelleher chuan, "Tun hma pawhin ka lo sawi tawh ṭhin. Kei chuan number 1 ni tura theihna neiah ka inngai a, kar tin inkhelh ka phu, ka ti a, chutiang tur chuan ka inbuatsaih bawk.

"Tun season-ah ka inkhel hnem a, ka vannei hle. Mahse, match tam tak khelh zel ka duh," a ti a, £29mtd man Mamardashvili a awm tak bawk avangin a tan chuan chhuah mai a fuh dawn tih a chiang - Aston Villa pawhin Irish keeper hi an ngaihven nia sawi a ni.