Inzaghi hun tawpna tur?

Simone Inzaghi-a'n Inter Milan a enkawl tirhin rin a hlawh lo a, Lazio-ah hna thawk ṭha tawk mah se, tawnhriat a ngah tawk loh avangin fans tam takin an ring lo.

Mahse, kum 2025 a thlen meuh chuan nomawi paruk a chawipui tawh a, a vawi hnih nan UCL final a hruai thleng - zanin an inkhel tur hi Inzaghi tan Inter a enkawl hnuhnun ber tur a ni mai thei!

Kum 49 mi hi Saudi Pro League club Al Hilal chuan an rim a, khawvela coach hlawh hnem ber nih tir an hreh lo niin an sawi - hei vang hian Izaghi-a'n nomawi chawi a duh dawn a, UCL nomawi nena Inter mangṭha a châk dawn.

Inzaghi hian Inter-ah kum khat contract la nei mah se, karleh hian club CEO Giuseppe Marotta nen an inbe dawn a, a hma hun a tichiang dawn.

Serie A khelh zawh takah Inter hian Napoli lakah uiawm takin nomawi an hloh bawk a, Italian coach hian, "Kan hriatreng tawh tur thil a ni. Kei mai ni loin, player-te pawhin na an ti êm êm a, zep tur a awm lo e," tiin a sawi thlawt.

Inzaghi tan rilru na thawidam nan UCL nomawi chawi a ṭul a, Inter Milan a chhuahsan dawn a nih pawhin, rilru hahdam takin, hna hlen inti takin San Siro a thlah thei ang - zaninah engkim chinfel a ni dawn e.