Djokovic-a'n fiahna hmasa paltlang

French Open khelh laiah Novak Djokovic chuan fiahna hmasa a hmachhawn a, a khingpui Corentin Moutet-a'n set point a hmuh tawh chu pawtthla lehin, third round a in hlangkai.

Serbian star hian awlsam takin hnehna a chang mai bik lo, darkar thum chuang an inkhelh hnuah tualchhung tlangval hi 6-3, 6-2, 7-6 (1) in a hneh a, vawi thum a champion tawhna hmunah a la dingnghet.

A awlsam lo

Court Suzanne Lenglen-a inkhelah kum 38 mi Djokovic hian set hmasa pahnih la tur chuan harsatna a tawk lo, set hnuhnung berah erawh Moutet nen an inchai tawk hle, a tawpah erawh a vannei zawk a ni.

Grand Slam vawi 24 champion tawh Djokovic chuan, "Corentin kha a che rang em em a, set thumnaah phei kha chuan kei aiin a che ṭha zawk ni hialin ka hria, set point pawh a hmu hman hial.

"Match tluan khan inthlahdah thei miah loin min siam a ni ber a, a thawkrimin a ball vuak kha a hlauhawm ṭhin takzet. A tawp lam hun pawimawh lai takin ṭha taka ka service thei kha a hlu," tiin a sawi.

Seeded parukna Djokovic hian a match lehpekah chuan Denis Shapovalov hnehtu Filip Misolic a hmachhawn leh ang - Austrian star Misolic hian inkhel dangah Shapovalov hi set nga an khelh hnuin a lo hneh ve leh thung a ni.

Sinner a chak

Jannik Sinner pawhin Roland Garros third round a lut, a khingpui Richard Gasquet chu 6-3, 6-0, 6-4 in a hneh a, hrem a tawh hnua inelna lian a hmachhawn hmasakah a che fuh rih hle.

Italian tlangval Sinner hi US leh Australian Open nomawi kalw mektu a ni a, major tournament bikah phei chuan match 16 chhung chak zawk mek a ni a, kum 1976 hnua Italian tlangval zinga French Open champion leh hmasa ber nih a tum mek.

Sinner hi kum 23 mi chauh a la nih laiin a khingpui Gasquet erawh thla thara kum 39 mi ni tawh tur a ni thung - Gasquet hian kum 2002 aṭang khan French Open a khel tawh a, hetih lai hian Sinner hi thla khat mi chauh a la ni thung.

Damdawi hman phal loh a hmang tih an hriat chhuah avangin Sinner hi thla thum chhung hrem a ni a, tun hnai khan hremna a hmang zo chiah - a match lehpekah chuan Czech Republic tlangval Jiri Lehecka nen an inhmachhawn leh dawn a ni.

Inkhel dang

Alexander Zverev chuan set hloh hmasa zuk mah se Jesper de Jong chu 3-6, 6-1, 6-2, 6-3 in a hneh a, season hmasa French Open finalist hi world number 88 De Jong lakah chesual thei dinhmunah ding mah se a tho chhuak leh ta zawk.

German tlangval Zverev chuan, "Ka khelh ṭhat ber ṭum a ni lo a, a bik takin set khatna ka che fuh lo. Round sang zawkah chuan tun aia ṭha khan, tihsual nei tlem zawka ka khelh a ngai tawh dawn a ni," tiin a sawi.

Jack Draper pawhin result ṭha a la nei chhunzawm - Britain tlangval hian tualchhung player ṭha Gael Monfils chu 6-3, 4-6, 6-3, 7-5 a hnehin second round a paltlang ve bawk a ni.

Kum 23 mi Draper chuan, "Rilru leh ngaihtuahna zawng zawng ka seng a, ka chau takzet a ni. Mipui lamin Gael Monfils kha an thlawp ṭha em em a, khatiang karah chuan inkhelh kha a awlsam lo," a ti.