Kohli-a'n IPL nomawi beisei zel

Indian Premier League-ah Virat Kohli telna Royal Challengers Bengaluru-in final an lut a, India cricket legend Kohli hian IPL nomawi a la chawi ngai loh avangin a tan final hlu bik a ni dawn. Nomawi inchuhna hi June 3, Thawhlehni zan dar 7:30 hian Narendra Modi Stadium-ah khelh a ni ang.

May 29, Ningani zan khan qualifier 1 khelh a ni a, RCB hian wicket riatin Punjab Kings an hneh. RCB hian final an lut nghal a, Punjab Kings erawhin June 1, Pathianni zan hian qualifier 2 an khel leh dawn. Nizan khan eliminator-ah Gujarat Titans leh Mumbai Indians te an inkhel a, heta chak zawk hian qualifier 2 an khel ang.

Qualifier 1 hi semifinal-a ngaih a ni a, hei vang hian New Punjab Cricket Association Stadium-a inkhel hi a pawimawh hle. RCB hi ṭhumvawrah vanneiin vawm hmasak an thlang. Bowler Josh Hazlewood (21/3), Suyash Sharma (17/3) leh Yash Dayal (26/2) te an che ṭha a, Punjab Kings-in over 14.1-ah 101 siamin an thi fai vek.

Target a hniam avangin RCB dan hna a awlsam. Kohli-a'n 12 runs chauh siam mah se Phil Salt-a'n thi loin 56 runs siamin Mayank Agarwal (19) leh Rajat Patidar (15*) ten an rawn siam belh a, RCB-in over 10 lekah 106/2 runs siamin hnehna an chang.