Rosario-ah Di Maria a kir

Benfica winger Angel di Maria chu a chawr chhuahna Rosario Central lamah a kir leh ta a, hun hlimawm leh lungawih thlak a tawn tawhna lamah football zinkawng a zawh leh dawn tihna a ni.

Kum 37 mi Di Maria hian Argentina club tan hian kum 2005 khan a match hmasa ber a khel ṭan a, chumi hnuah European club lian hrang hrang tan a khel - Real Madrid, Manchester United leh Paris Saint Germain tan sulhnu a hnutchhiah.

Rosario chuan thu chhuah siamin, "Thawnthu ziah hmabak tam tak kan la nei a, kan ziak chhunzawm zel ang. I inah ngei mai kan lo lawm a che," tiin Di Maria an lawm luhna thu an ziak.

Nipui bazar hmasa khan Di Maria hi Rosario-ah hian kir leh tura ngaih a ni a, inbiakna pawh thui tak a kal hman. Mahse, amah mai bakah a chhungte thlengin vauna an tawk a, boruak a ṭhat loh avangin a kir lo.

Tunah erawh boruak ṭha leh muanawm tak hnuaiah bul a ṭan thar leh dawn a ni a, a kum tam deuh tawh mah se season hmasa lama Benfica tana a khelh dan chhut chuan a la chhawr tlak hle ang.