AC Milan-in an coach an ban

Thla ruk lek an thawhho hnuah AC Milan chuan an coach Sergio Conceicao chu an ban fel der - a hmunruak luah tur la puang chiah lo mah se, an manager hlui Massimiliano Allegri chu an lalut dawn niin khawthlang chanchinbu mite chuan an tarlang.

Kum 50 mi Conceicao hian nikum December thla aṭang khan a hna hi a thawk ṭan a, manager an ban tak Paulo Fonseca a thlak. Porto a enkawl laiin Conceicao hi a hlawhtling viau, kum ruk chhungin nomawi 11 a chawi pui.

AC Milan hian thla 18 chhung atan inremna an ziahpui a, hna a zawm aṭanga rei lo teah Italian Super Cup a lakpui a, a lakah beiseina a sang chhunzawm. Mahse, an duh leh beisei ang vek chuang thil a kal ta bik lo.

Coppa Italia final-ah Bologna an hneh lo, Serie A lamah pariatna an ni bawk - season tharah European football an khelh phak dawn loh laiin an hmelma Inter Milan erawhin Champions League final an lut thung.

Italian club hlun Milan chuan thuchhuah siamin, "Sergio leh a thawhpuite chungah lawmthu kan sawi, puitling leh felfai takin thil an kalpui a, kan club-in nomawi 50-na kan chawi theih nan min pui bawk," an ti a, a kal zelna tur atan duhsakna an hlan bawk a ni.