Best player-ah Zirtea, Best keeper RS-a

CYMA Football-ah team 154 an tel a, player 3000 chuang zinga best player-a thlan chu Republic Veng captain Lalnunzira a ni. Zirtea hi Chhinga Veng tana a khelh lain I Day Football-ah best player-ah thlan a ni tawh a, tun ṭuma best player-a thlan a ni pawh hi a phu hle.

Tun inelnaah hian Zirtea hian goal li a khung a, Republic Veng midfield thahrui niin, minute zawng zawng a khel vek. Republic Veng hian first round aṭanga an khelh ṭan bakah quarterfinal aṭangin extra time an khel vek a, kar khat chhungin minute 360 khelin, hun pek belh tiam loin tun inelnaah minute 900 a khel tihna a ni.

Best goalkeeper-a thlan RS Lalawmzuala hi final tiamin tun inelnaah vawi li ngawt man of the match a thlan a ni a, penalty shootout-ah a team vawi hnih a chakpui bawk. Top scorer MS Dawngliana'n goal 12 a khung a, Bawngkawn striker hi goal hmaah a la hriam ṭha hle.