Khawvela coach ṭha ber kan nei - Al-Khelaifi

Europe-a club ṭha ber ni tura Paris St-Germain din tumtu, chumi atana sum pawh seng hnem tak, PSG president Nasser al-Khelaifi meuh pawhin Champions League nomawi an chawi meuh chuan khawvela coach ṭha ber an neih thu a sawi.

Qatari sumdawng hausa chuan, "Pathian hnenah lawmthu awm se, khawvela manager ṭha ber neitu kan ni tih kan team-in kan pholang a ni - khawvela coach ṭha ber leh player ṭha ber ber neitu kan ni a, fans ṭha tak tak kan nei bawk," a ti a, a lawm hle.

Kylian Mbappe-a'n PSG a chhuahsan khan Luis Enrique-a'n 'star player' hmanga team din a duh lo a, kum naupang leh theihna nei sang hmanga team din a duh - player langsar lei nana sum tam tak sengtu Nasser al-Khelaifi leh football advisor Luis Campos ten Enrique chungah rinna an nghat a, an tisual lo.

Al-Khelaifi chuan, "Kan season hman tawh a zawnga ṭha ber a ni a, nuam kan ti hle. Hma hun thlir chungin team kan din a, zaninah khan chak lo pawh ni ila, kan kalphung hi kan thlak miah lo ang.

"Tun hi bul kan ṭan chauhna a ni a, uang thei kan ni lo. France ram leh kan fan te ka lawmpui a, Paris khawpui tan chauh ni lo, France tan he nomawi hi a hlu a ni. League ṭha tak, club ṭha tak tak neitu kan ni a, hma kan sawn zel ang," a ti a, French football tan UCL champion club neih chu a hlut thu a sawi.

Al-Khelaifi chuan sawi zawmin, "PSG kan enkawl hnuah sawiselna kan tawk nasa a, French football tana thil danglam tak tih kan tum laiin min sawisel nasa hle. Kan tan chuan a na em em a, mahse, kan tumah kan chiang thung a ni," a ti - tunah chuan a duh ber UCL nomawi chu Enrique-a'n a pe ta!