Djokovic leh Zverev an tlang
French Open khelh laiah Novak Djokovic leh Alexander Zverev te chuan an khingpui ve ve hnehin last 16 an inhlangkai, vawiin tlai lamah match an khelh chhunzawm leh nghal ang.
Inrinni zan inkhelah Djokovic hian Filip Misolic chu 6-3, 6-4, 6-2 in a hneh a, inkhel dangah Alexander Zverev chuan Flavio Cobolli 6-2, 7-6(4), 6-1 a hnehin a thiam zual 16 zingah a inhlangkai ve ta bawk.
Match 99
Grand Slam bikah chuan match khat lek chak pawh a harsa - Djokovic erawhin French Open bikah chauh pawh vawi 99 teh meuh hnehna a chang tawh a, mellung pawimawh bik phun turin match khat chak a la hmabak.
Court Philippe Chatrier-a inkhelah, vawi thum champion tawh Djokovic hian a tir aṭangin harsatna lian tham a tawk lo; Paris khawpuia mi tam takin Champions League final boruak an ngaihven karah hnehna a lo chang a ni.
Grand Slam vawi 24 champion tawh Djokovic chuan, "Ka tan chuan match tin mai hi a pawimawh, a chhan chu ka dai ngai loh ram a nih zel vang a ni a, match 100 hi ka chak thei ang em tih erawh sawi lawk theih a ni lo," tiin a sawi.
Serbian star hian a match lehpekah chuan Cameron Norrie a hmachhawn ang - British tlangval Norrie hian inkhel dangah Jacob Fearnley chu 6-3, 7-6 (7-1), 6-2 a hnehin third round a lo paltlang ve bawk a ni.
Zverev a chak
Champion rinkai a ni ṭhin a, mahse a la hlawhtling chiah lo - Zverev chuan a vawi khat nan Grand Slam title lak a tum chhunzawm zel a, match thum a khelh tawh chinah set khat chiah a la hloh.
Kum 28 mi Zverev chuan, "French Open hi chuan ka nunah thawnthu a ngah a, kuminah hian a tawp thleng ziah ngei ka tum," tiin a sawi a, clay court hi a inkhelh thiamna hmun a nih avangin beisei a nei sang zual ang.
Inkhel dangah Jack Draper pawhin Joao Fonseca chu 6-2, 6-4, 6-2 in a hneh. Brazilian rawlthar rawlthar Fonseca hi player beisei awm tak zinga mi ni mah se kum 18 mi chauh a la ni a, a ruh a la no deuh tih a lang.
Nipui lai a ni a, inelna neihna hmun Paris khawpuiah khua a lum em avangin player ṭhenkhat chuan harsatna an tawk. Season dang ang a nih chuan ruah surin a la tibuai chhunzawm leh pawhin a rinawm bawk.