Liverpool player thar Frimpong

Premier League champion Liverpool chuan an squad an thuam chhah zel - Reds hian Jeremie Frimpong chu Bayer Leverkusen aṭangin an la lut a, pound maktaduai 29.5 seng in an lei.

Trent Alexander-Arnold-a'n Real Madrid a zawm tih a chian hnu lawkah Liverpool hian Frimpong an lak thu hi an puang ve nghal a, season nga chhung atan inremna hi an neihpui a ni.

Kum 24 mi Frimpong hi mamawhna hmuna chhawr kual theih a ni, coach Arne Slot-a chuan Arnold hmun ruak hnawh khah nan a hmang thei tura ngaih a ni a, a chungah mawhphurhna a lian nghal dawn.

Netherlands international hian 2023-24 season khan Bayer Leverkusen chu Bundesliga champion a nihpui a, season liam ta khan a club tan hian inelna hrang hrangah match 53 khelin player pawimawh a ni.

Frimpong chuan, "Ka tan chuan duhthusam hrang hrang thleng dik a ni ber mai. Liverpool ṭantute hnena ka thuchah duh chu, he club tan hian ka theihna zawng zawng ka hlan ang.

"Lawm takin min lo pawm a, an lawmna siamsak let ve ngei ka tum dawn a ni," a ti. Kum 2022-23 leh 2023-24 season khan Bundesliga Team of the Season atana thlan zingah a lo tel tawh, tawnhriat a nei ṭha tawk.

Reds manager Slot-a'n Dutch player Virgil van Dijk, Cody Gakpo leh Ryan Gravenberch te a kawlsa a, tunah Frimpong a neih belh leh ta, nipui bazarah player dang lakluh tumin hma an la mek bawk.

Liverpool hian Leverkusen aṭang thoin Florian Wirtz lakluh an tum mek - Germany forward Wirtz lakluh nan hian pound makatduai 109 bawr vel an hman ngam a ngai dawn niin a lang a, indawrna an kalpui mek a ni.