NBA Finals-ah Pacers an lut

Indiana Pacers chuan kum 2000 hnua a vawi khat nan NBA Finals an lut ve leh ta - Pacers hian New York Knicks chu 125-108 in an hneh a, an phu ang ngeiin Eastern Conference champion an ni.

Game 6 an lak leh tak avangin Pacers hian best of seven series chu 4-2 in an la. NBA Finals-ah Pacers hian Western Conference champion Oklahoma City Thunder an hmachhawn leh ang.

Nimin inkhelah Pascal Siakam a hmuhnawm, ani hian Pacers an chak theih nan point 31 a nei - season a hman ṭhat avangin Most Valuable Player (MVP) ni thei turin kawng dik a zawh mek zel.

NBA champion pawh lo ni tawh Siakam chuan, "Tun hma lama kan lo hlawhtlin tawhna kha a hlu a, tuna kan thlen chin nen hian a hlut dan a inang lo. Tunah chuan hma bak tam tak kan la nei," a ti.

June 6, Zirtawpni zing dar 6:00 aṭangin Thunder leh Pacers te hian NBA Finals an khel chhunzawm dawn. Basketball inelna ngaihhlut bera champion hre tur hian best of seven series hmang bawkin inelna an hmachhawn ang.