Tun season India ram football a tawp dawn? July thlaah pawh inelna a ṭan theih lo ang - Deputy Chairman

League committee deputy chairman Lalnghinglova Hmar chuan, "July thlaah pawh inelna ṭan theih a ni lo ang," tiin season thar thlir chungin season kal lai tihtawp mai chu a finthlak thu a sawi.

League Committee-te hi video conferencing hmangin an inhmu khawm a; football hmalam hun pawimawh chungchang sawinaah hian League Committee chairman Subrata Dutta,  AIFF general secretary Kushal Das, League CEO Sunando Dhar, League deputy chairman Lalnghinglova Hmar bakah Souter Vaz, Anil Kumar, BK Roka, Chirag Tanna leh Rochak Langer te an tel.

Meeting-ah hian sawm bik Swati Kothari, GM (Strategy & Operations and International Relations) pawh a tel a, tun season India ram football football kal zel dan tur an sawi ho. League Committee hian an thurel hi AIFF Executive Committee hnenah an thlen ang a, India rama football thuneitu sang ṭhutkhawm hun hi a la hriat loh.

League Committee thurel zingah I League-in hmun pawimawh a chang. Mizo club Aizawl FC telna inelnaah Mohun Bagan chuan match 16 khelhah point 39 hmuin an hnuaia chiaha awm East Bengal-in an umpha thei tawh lo a, champion tawhah an inngai.

Amaherawhchu Covid-19 vangin inelna khelh chhunzawm theih a ni lo a, League Committee chuan inelna tihtawp chu ṭha zawkah an ngai. League committee deputy chairman Lalnghinglova Hmar chuan, "Coronavirus vanga buaina hian eng chen nge a daih dawn a hriat loh a, Pathian zarah Mizoram hi kan him a nih pawhin India ram khawpui dang chu a him lo tih a chiang. AIFF hnuaia inelna hrim hrim hi tuna kan dinhmun thlir chuan tihtawp mai hi ṭha zawkah a ngaih theih," a ti. 

League Committee thutlukna hi AIFF-in la ngaihtuah dawn mah se a tlang ngei a rinawm a, Mohun Bagan tan thu hriat nuam a tel. Mariners hi 2019-20 atan champion-ah puan ni se tiin League Committee chuan a rel a, Mizo club tan pawh chanchin lawmawm a awm.

Aizawl FC hian match 15 khelhah point 16 an hmu a, an hnuaiah relegate thei lo Indian Arrows chauh an awm. League Committee chuan inelna khelh zawh theih a nih dawn loh avangin relegate awm lo se tiin an rel a, Mizo club an him dawn. Hei chauh hi a ni lo, champion Bagan tih lo zawng club 10-in pawisa dawn tur chu a zata insem ni se an ti. 

Mizo club hi pahnihna dinhmun hauhtu East Bengal te nen an pawisa dawn a inang thei dawn tihna a ni. Chutihrualin Standly Rosario hote hian an hmabak match ngaah khualmualah Punjab FC an hmachhawn dawn a, a bak zawng chu RG Stadium-ah vek an khel dawn. Aizawl FC mikhual turte hi Neroca, Indian Arrows, Gokulam Kerala leh East Bengal te a nih avangin inelna hi an khel zo thei a nih chuan relegate zone an chhuahsan ngei a rinawm hle.

India rama inelna sang ber Indian Super League khelh zawh hman ni mah se inelna dang zawh hman a ni lo a, an hnuaia tarlan ang hi League Committee-in an thlen tur chu a ni.

1. 2019-20 season chu tihtawp ni se.

2. Hero I League chu March 14, 2020 aṭangin tihtawp a ni a, season tawp lo mah se pakhatna dinhmun hauhtu Mohun Bagan chu champion-a puan ni se. Kolkata club hian match 16 aṭangin point 39 an hmuh tawh avangin club dangin an umpha thei tawh lo.

3. I League-ah hian champion pawisa dawn tur tiam loin pawisa semchhuah tur dang zawng chu club 10 ten an inzat ṭheuhin insem nise.

4. Hero I-League 2019-20 season-ah relegate awm lo se. 

5. Hero 2nd Division chungchangah AIFF Executive Committee leh Asian Football Confederation te ngaihdan lak a ṭul a, Hero I-League 2020-21 khel tur zawnna hi inelna ṭan theih hunah hun rei lo zawka neih ni se.

6. AIFF hnuaia kum bithliah inelnaah match 500 bawr vel khelh loh a la awm a, inelna tihtawp chu naupang beiseiawm tan vanduaina a ni dawn. Hei vang hian kumina neih tur Hero Sub-Junior League, Hero Junior League, Hero Elite League, leh U-17 Khelo India Girls League te chu season thar 2020-21 ah a ngaia neih ni se. Hemi a tlang a nih chuan season thara over age turten inelna a la hmachhawn thei ang. 

7. AIFF Academy Accreditation chungchang ngaihtuah a ni a, League Committee chuan Covid-19 buaina avangin inthlahdul ṭha an ti. AIFF-in a tum ber chu club leh player tam thei se tih a ni a, chuvangin club hoin document an thehluh hun pawh tih tlai ni se.