Chelsea-in Waldschmidt lakluh an tum
Premier League club Chelsea chuan nipui transfer-ah German striker Luca Waldschmidt chu pound maktaduai 20-a lakluh an tum dawn niin khawthlang media-te chuan an tarlang.
Chelsea hmatawng player zingah London club chhuahsan tum an awm nual a, Frank Lampard laka tla tlum lo Michy Batshuayi leh Olivier Giroud te pawhin chhuah an tum niin an sawi.
Willian chuan nipuiah hian a contract a hmang zo tawh dawn a, hetiang boruak karah hian Lampard chuan a squad a thuam chhah theih dan tur a ngaihtuah mek.
Kum 23 mi Waldschmidt hian Germany senior team tan pawh match thum a khel tawh a, nikum Euro Under-21 Championship-a final an luh ṭum khan match liah goal sarih khungin top scorer a ni.
Germany legend Gerd Muller-a hming lem 'Der Bomber' behchhana 'Il Bomber' an tih striker hian Covid-19 vanga football a chawlh hma khan tun season-ah SC Freiburg tan match 16 khelin goal ruk a khung a, assist vawi hnih a nei.