Maddison-a'n Leicester chhuahsan tumna a nei lo
Leicester City attacking midfielder James Maddison chuan Foxes-ah a hlim thu a sawi a, transfer inhawn veleha Maddison lakluh tumtu nia an sawi Manchester United tan chuan thu hriat nuam a ni lo ang.
Maddison chuan, "Season hnih duhawm tak ka hmang tawh a, he hmuna ka hun hman second tin maite kha ka ngaihlu em em vek a ni. Leicester-ah hian mahni ina awm ang mai ka inchan a, inchhung ti mawitu zinga mi niin ka inhria a, he hmun hi nuam ka ti a ni," a ti.
Kum 23 mi attacking midfielder hian season hmasa khan Leicester tan inelna hrang hrangah match 38 khelin goal sarih a khung a, tun season chawlh a nih hma khan match 35 khelin goal kua a khung thung.
Manchester United chuan Maddison hi transfer bazar inhawn veleh pound maktaduai 80 vela lakluh an inhuam nia sawi a awm a, mahse English player ṭhangduang hian chhuah tumna a nei tlat lo.
Maddison chuan, "Ka ṭhiante hi inkhelhpui an nuam ka ti a, fan-te ka ngaina a, manager ṭha tak kan nei bawk. Heng zawng zawng vang hian he hmunah hian ka hlim em em a ni," a ti.
England international hian League One club Coventry City aṭanga a professional career ṭanin Foxes tana a khelh hma hian Norwich City leh Scottish Premiership club Aberdeen tan a lo khel tawh.
Maddison chuan, "Kum li liam ta kha kan thlir chuan Norwich aṭangin Aberdeen-ah loan-in ka khel a, tunah erawh kartinin Premier League match ka khel ta - hei lo hi duh dang ka nei chuang lo," a ti.
Hetihlai hian tun lai hri leng Covid-19 vangin club tam tak an talbuai mek a, Maddison hian Foxes chhuahsan lo duh tehreng pawh ni se United hian a leina tur pawisa an nei kher ang em, tih chu zawhna awm thei a ni.